كاسىپكەر جانە قازاتومپرومنىڭ بۇرىنعى باسشىسى مۇحتار جاكىشيەۆ جاڭا جوبا باستادى. الايدا وعان كەدەرگى كەلتىرۋشىلەر پايدا بولعان، - دەپ حابارلايدى Dalanews.kz.
بۇل تۋرالى جاكىشيەۆ جۋرناليست ۆاديم بورەيكوعا بەرگەن سۇحباتىندا ايتتى. مۇحتار جاكىشيەۆ كەننەن نيكەل الۋدىڭ بىرەگەي تەحنولوگياسىن جاساپ شىعارعان. ونىڭ الەمدە بالاماسى جوق. الايدا ەلدە جاكىشيەۆتىڭ بۇل جوبالارىن اياقتان شالىپ جاتقاندار تابىلعان.
"جاپونياداعىلار 50 پايىز ينۆەستيسيا قۇيۋعا دايىن. بۇل جاپونيا ۇكىمەتىنىڭ رەاكسياسى. ال بىزدىكىلەردىڭ رەاكسياسى قانداي؟
باستاپقىدا يندۋستريا جانە ينفراقۇرىلىمدىق دامۋ مينيسترلىگى حات جىبەردىك. 2023 جىلدىڭ 13 ماۋسىمىندا مينيسترلىككە حات جولدادىق. حاتتا كەن ورنىنان نيكەل وندىرۋگە ءتيىستى ۋران تەحنولوگياسىنا نەگىزدەلگەن بۇرىنعى ەسكى وندىرىستىك باعدارلاما جۇمىس ىستەمەيتىنىن ايتتىق. ءبىز ول تۋرالى 1،5 جىل زەرتتەۋ جۇرگىزدىك. بۇل تەحنولوگيا جۇمىس ىستەمەيتىنىنە كوز جەتكىزدىك. قول قۋسىرىپ وتىرماي، الەمدە بالاماسى جوق تەحنولوگيا ويلاپ تاپتىق. ول تەحنولوگيانىڭ ارتىقشىلىعى نەدە؟ ءبىز نيكەلدى وسى تەحنولوگيانىڭ ناتيجەسىندە الامىز، ول "جاسىل" تەحنولوگيا، ياعني ارتىق قالدىق بولمايدى. بۇل الەمدەگى العاشقى "جاسىل" نيكەل بولماق. حاتتا وسىنىڭ ءبارىن باياندادىق. ءبىراق ۆيسە-مينيستر شارحان يران باس تارتتى. بۇل ءبىرىنشى حات"، - دەيدى جاكىشيەۆ.
ارتىنشا قاراشادا جاكىشيەۆ مينيسترلىكتەگىلەر بۇعان دەيىن حاتتا جازىلعان نارسەنى تۇسىنبەي قالعان بولار دەپ ويلاپ، بۇرىنعى تەحنولوگيا جۇمىس ىستەمەيتىنىن تاعى ايتىپ، جاڭا باعدارلاما ۇسىنىپ، قايتادان حات جىبەرگەن.
"قايتادان باس تارتتى (مينيسترلىك). ودان كەيىنگى حاتتى 25 قاڭتاردا جىبەردىك. قايتادان ۇسىنىسىمىزدى قابىلداماي، باس تارتتى. قۇجاتقا شارحان يران قول قويعان"، - دەيدى مۇحتار جاكىشيەۆ.
ايتا كەتەيىك، مۇحتار جاكىشيەۆتىڭ سوزىنشە، ول ازىرلەگەن تەحنولوگيا قازاقستان اۋماعىندا ورنالاسقان كەن ورىندارىن يگەرۋگە مۇمكىندىك بەرەتىن كورىنەدى.
