مۇحتار جاكىشيەۆ ءوزىن پرەزيدەنت بولامىن دەپ ەسەپتەيدى. مۇنداي بولجامدى "زلوبنايا تاتەشكا" تەلەگرام ارناسىنىڭ ساراپشىلارى جاسادى، - دەپ حابارلايدى Dalanews.kz.
ساراپشىلاردىڭ سوزىنشە، جاكىشيەۆتىڭ مەديا-الاڭنان ءجيى كورىنۋىنىڭ دە سەبەبى سول. ال ونىڭ سوتتى بولۋى سايلاۋالدى كامپانيا ۇيىمداستىرۋىنا كەدەرگى كەلتىرۋى مۇمكىن.
"ءبىراق ءتۇپتىڭ تۇبىندە قانداي دا ءبىر ادام بيلىككە كەلۋى ءۇشىن زاڭ وزگەرىپ، بەلگىلى ءبىر شەشىمدەر وزگەرتىلگەن كەزدەر بولدى عوي. مىسالى گرۋزيادا 2011 جىلى سول كەزدەگى پرەزيدەنت ميحايل سااكاشۆيلي ارنايى قاۋلى شىعارىپ، ميللياردەر بيدزين ءيۆانيشۆيليدى ازاماتتىعىنان ايىرعانىمەن، ول كەلەسى جىلى پارلامەنت سايلاۋىندا جەڭىسكە جەتىپ، پرەمەر بولدى"، - دەيدى ساراپشىلار.
ەسكە سالايىق، بۇعان دەيىن ساراپشىلار مۇحتار جاكىشيەۆتىڭ ۆاديم بورەيكوعا بەرگەن سۇحباتىن تالدادى. اڭگىمە ۋران كەن ورىندارىنىڭ شەتەلدىكتەرگە تيىن-تەبەنگە ساتىلىپ كەتكەنى تۋرالى بولىپ وتىر.
ساراپشى نۇرلان جۇماعۇلوۆ Facebook-تە "قازاتومونەركاسىپ" ۇلەسى ءابىليازوۆقا قانشا اقشاعا ساتىلعانىن، ال ول كەيىن شەتەلدەرگە ۇلەسىن ساتىپ، قالاي بايىعانىن ايتادى.
"بۇل جولى ولار (جاكىشيەۆ پەن بورەيكو - ەسك.) ۋران كەن ورىندارى كانادالىقتارعا تيىن-تەبەنگە ساتىلعانىن تۇسىندىرۋگە تىرىستى. وكىنىشكە قاراي، ينتەرنەت ءبارىن ەسىندە ساقتايدى. 2005 جىلى "قازاتومونەركاسىپ" 120 مىڭ دوللارعا "قىزىلقۇم" جشس-دەگى ۇلەسىنىڭ 30 پايىزىن ءابىليازوۆقا ساتتى، كەيىن ول كانادالىق كاسىپكەرگە ساتتى. بىرنەشە ايدان كەيىن، 2005 جىلعى قاراشادا كانادالىق كاسىپكەر بۇل ۇلەستى (30 پايىزدى) Uranium One كومپانياسىنا 75 ميلليون دوللارعا قايتا ساتتى.
جاكىشيەۆ ۋران باعاسىنىڭ ءبىر فۋنتى 136 دوللار بولعان كەزدە ۇلەس ساتىلعانىن ايتقان ساتتە قيتۇرقىلىق جاساپ وتىر (مۇنداي باعا 2006 جىلى بولدى).
قانداي دا ءبىر سەبەپتەرمەن جاكىشيەۆ "بەتپاق دالا" جوباسىنداعى 70 پايىز ۇلەس ساتىلعانىن ايتپادى. ويتكەنى ول "قازاتومونەركاسىپتىڭ" ۋران ۋچاسكەلەرىندە كەم دەگەندە 50 پايىزىن ساقتاپ قالدى. 70 پايىزدى كانادالىق كاسىپكەر ءابىليازوۆتان ساتىپ العاننان كەيىن Uranium One-عا 350 ميلليون دوللارعا ساتتى.
"قازاتومونەركاسىپ" بۋدەنوۆ كەن ورنىنىڭ ۋران ۋچاسكەلەرىن انيسيموۆقا تيىنعا ساتىپ جىبەرگەنى تۋرالى اڭگىمە بولعان جوق (7 ۋچاسكەگە بولىنگەن، بارلىق جەردە "قازاتومونەركاسىپ" ۇلەسى - 51 پايىز). نەلىكتەن انيسيموۆ اقباستاۋ (1،3،4 ۋچاسكەلەر) جانە قاراتاۋ (2 ۋچاسكەسى) ۇلەستەرىن ساتۋدان جۇزدەگەن ميلليون دوللار، ال بۋدەنوۆ كەن ورنىنىڭ 6 جانە 7-ۋچاسكەلەرى بويىنشا سوڭعى مامىلەدە 1،3 ملرد. تابىس تاپتى؟
جاكىشيەۆ "جاراپ تۇر": "قازاتومونەركاسىپتى" كوتەردى. ءبىراق ونىڭ الاياقتىعىنىڭ ارقاسىندا ءابىليازوۆ، كلەبانوۆ، انيسيموۆ قالتاسىن قالىڭداتقان بولىپ تۇر ما؟" - دەپ جازدى ول.
ايتا كەتەيىك، بۇعان دەيىن "قازاتومپرومعا" قاراستى "بۋدەنوۆ" كەنىشى رەسەيلىكتەردىڭ قاراماعىنا ءوتتى. "روساتوم" بۇدان بىلاي كەنىشتىڭ 49 پايىز اكسياسىنا يەلىك ەتەدى.
الايدا "قازاتومپرومنىڭ" بۇرىنعى باسشىلىعى: باس ديرەكتور عالىمجان ءپىرماتوۆ، باسقارما ءتوراعاسى ءماجيت ءشارىپوۆ، باس وپەراسيالىق ديرەكتور اسىلان بولەكباي جانە باسقا دا توپ-مەنەدجەرلەر "بۋدەننوۆتى" رەسەيلىك مونوپوليسكە ساتۋعا قارسى بولعان.
DALA INSIDE مالىمەتىنشە، "روساتوم" "سامۇرىق قازىناعا" 1،6 ملرد دوللار بەرگەن. كەلىسىمدى "گازپروم" قارجىلاندىرعان.
