ىستامبۇلداعى جەر سىلكىنىسىنە بايلانىستى قازاقستاننىڭ سىرتقى ىستەر مينيسترلىگى مالىمدەمە جاسادى،- دەپ حابارلايدى Dalanews.kz.
تۇركيا بيلىگىنىڭ اقپاراتى بويىنشا 23 ساۋىردە ىستامبۇل ماڭىندا ماگنيتۋداسى 6،2 بالل جەر سىلكىنىسى بولىپ، ارتىنان افتەرشوكتار جالعاسىپ جاتىر.
"ءقازىر تۇركيا اۋماعىنداعى قازاقستان ازاماتتارىنان ىستامبۇل قالاسىنداعى ق ر باس كونسۋلدىعىنا وتىنىشتەر تۇسكەن جوق. ق ر سىرتقى ىستەر مينيسترلىگى تۇركيا بيلىگىمەن جانە قازاقستاننىڭ تۇركياداعى ديپلوماتيالىق وكىلدىكتەرىمەن بىرلەسىپ احۋالدىڭ دامۋىن قاداعالاپ وتىر. ىستامبۇل قالاسىنداعى ق ر باس كونسۋلدىعىنىڭ كونسۋلدىق ەسەبىندە 1137 قازاقستان ازاماتى تىركەلگەن. وتانداستارىمىزدى سابىرلىق جانە قاۋىپسىزدىك شارالارىن ساقتاۋعا، سونداي-اق، جەرگىلىكتى بيلىك ورگاندارىنىڭ نۇسقاۋلارىن مۇلتىكسىز ورىنداۋعا شاقىرامىز"، - دەپ جازىلعان حابارلامادا.
ايتا كەتەيىك، ىستامبۇلدا 23 ساۋىردە جەرگىلىكتى ۋاقىت بويىنشا 12:49-دا جويقىن جەر سىلكىنىسى تىركەلدى. تۇركيانىڭ توتەنشە جاعدايلار باسقارماسىنىڭ (AFAD) مالىمەتىنشە، جەراستى دۇمپۋلەرى ىستامبۇل، تەكيرداگ، يالوۆا، بۋرسا جانە بالىكەسير پروۆينسيالارىندا سەزىلگەن.
