ىشكى ىستەر مينيسترلىگى جول جۇرىسىنە قاتىسۋشىلارعا ۇندەۋ جاسادى، - دەپ حابارلايدى Dalanews.kz.
"اۋا-رايىنىڭ كۇرت وزگەرۋىنە بايلانىستى جولدار كورىنبەيدى. تايعاق، مۇزدى جەرلەر اپاتقا اكەپ سوعۋى مۇمكىن. سونداي-اق اۋا-رايىنىڭ بۇزىلۋى كولىك قۇرالىنا دا اسەرىن تيگىزەتىنىن ەسكەرۋ قاجەت. كولىكتىڭ تەحنيكالىق جاعدايىن، تەجەۋ جۇيەسىنىڭ جۇمىسىن قاراڭىز. تەرەزە تازالاعىش ششەتكالار، سونداي-اق سۇيىقتىقتىڭ دەڭگەيىن تەكسەرىڭىز! قىسقى دوڭعالاقتاردى قولدانىڭىز! ول قاۋىپسىزدىكتى قامتاماسىز ەتەدى جانە دوڭگەلەكتەرگە جولدا سىرعاناۋعا قارسى تۇرۋعا مۇمكىندىك بەرەدى. تەحنيكالىق رەگلامەنتكە سايكەس قىسقى كەزەڭدە قىسقى شينالارمەن جابدىقتالماعان كولىك قۇرالدارىن پايدالانۋعا تىيىم سالىنادى! قاشىقتىقتى ساقتاڭىز! اسىرەسە قىس مەزگىلىندە الدا كەلە جاتقان كولىك قۇرالىنا دەيىنگى ۇلكەن اراقاشىقتى ۇستانىڭىز"، - دەپ جازىلعان حابارلامادا.
ۆەدومستۆو تەجەگىشتى باياۋ باسۋعا كەڭەس بەردى.
"جول جۇرىسىنە قاتىسۋشىلاردىڭ بارلىعىنا مۇقيات بولىڭىز! جاياۋ جۇرگىنشىلەرگە دە نازار اۋدارىڭىز. ەسىڭىزدە بولسىن، كىشىگىرىم قاتەلىكتىڭ ارتى اۋىر زارداپتارعا اكەلۋى مۇمكىن. اۋا-رايىنىڭ قولايسىزدىعىن ەسكەرە وتىرىپ، جىلدامدىقتى شامادان تىس اسىرماڭىز! جىلدام ءجۇرىستىڭ كەسىرىنەن كولىك باسقارۋ كەزىندە باقىلاۋدى جوعالتۋىڭىز مۇمكىن. جۇرەر جولىڭىزدى الدىن الا جوسپارلاڭىز! اۋا-رايى بولجامىن باقىلاپ، قالا ماڭىنداعى جولداردىڭ جابىلۋى تۋرالى حابارلامالاردى مۇقيات قاداعالاڭىز. ەگەر جولدار جابىق بولسا، ەلدى مەكەندەردەن تىس جەرلەرگە شىعۋدى شەكتەڭىز. قۇرمەتتى جول جۇرىسىنە قاتىسۋشىلار!
جول ەرەجەلەرىن ساقتاۋ – ءسىزدىڭ جاۋاپكەرشىلىگىڭىز. ءوزىڭىزدىڭ جانە وزگەنىڭ ومىرىنە نەمقۇرايلى قاراماڭىز. جولداعى قاۋىپسىزدىك شارالارىن جانە جول ءجۇرىسى قاعيدالارىن ساقتاۋ وزىڭىزدەن باستالادى. ۇيدە جاقىندارىڭىز كۇتىپ وتىرعانىن ۇمىتپاڭىز!" – دەدى ءىىم اكىمشىلىك پوليسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.
