[caption id="attachment_257027" align="aligncenter" width="508"]
دۋمان رامازان[/caption]
قالامگەر دۋمان رامازاننىڭ جازباسى بىلە-بىلگەنگە تازا ساركازم. الەۋمەتتىك جەلىدەگى پاراقشاسىندا جازۋشى كۇنى كەشە عانا "تاڭشولپان" باعدارلاماسىنىڭ ديرەكتورى بولىپ تاعايىندالعان ءانشى گۇلنۇر ورازىمبەتوۆانى بىلايشا ايتقاندا ماقتامەن باۋىزداپتى. باسقاسىن بىلمەيمىز، بىزگە سولاي كورىندى ول نە دەيدى سوندا؟ وقيىقشى.
كەرەمەت تاڭداۋ!
«قازاقستان» رترك» اق-نىڭ جاڭا باسشىسى، ساياساتتانۋشى ەرلان قارين مىرزا ءانشى گۇلنۇر ورازىمبەتوۆانى «تاڭشولپان» باعدارلاماسىنىڭ ديرەكتورى قىلىپ تاعايىنداپتى. نەسى بار، وتە كەرەمەت تاڭداۋ. ەرلان مىرزانىڭ قانداي كەرەمەت تاڭداۋ جاساعانىنا تاڭ قالىپ وتىرمىن.
گۇلنۇر ورازىمبەتوۆانىڭ «تاڭشولپاندى» شىرق اينالدىراتىنىنا سەنىمىم كامىل. ەندى كورەرمەندەر ىلعي جاقسى حابارلار كورەتىن بولادى. ءقازىردىڭ وزىندە «تاڭشولپاندا» كەرەمەت جاڭالىقتار، تىڭ وزگەرىستەر بولىپ جاتىر. كورمەيتىندەر، تۇيەنى دە كورمەيدى. ءجۇز سەكسەن گرادۋسقا وزگەردى. ءىشى كۇيگەندەر تۇز جالاي بەرسىن، بۇرىن ونى ەشكىم دە قاراماۋشى ەدى، وتە ناشار بولاتىن. ال گۇلنۇر كەلگەلى «تاڭشولپان» جالپى حالىقتىق باعدارلاماعا اينالىپ كەلە جاتىر. ويتكەنى، گۇلنۇر ورازىمبەتوۆانى وتە ءبىلىمدى، ءوز ءىسىنىڭ بىلگىرى، كاسىبي مامان دەپ ەسەپتەيمىن.
ونىڭ قولىنان ءبارى كەلەدى. قىزىقسىڭدار وزدەرىڭ!..
قىزعانشاقتار
ال ءقازىر تالانتتى ءانشىنى كورە المايتىندار، قىزعانشاقتار، ءىشى تارلار، توپشىلدار ونى بۇل قىزمەتكە لايىق ەمەس دەپ شۋلاسىپ جاتىر. ايتسا، ايتا بەرسىن! قىرتاتىندار قىرتا بەرسىن! ەل نە دەمەيدى! «يت ۇرە بەرەدى، كەرۋەن كوشە بەرەدى!»
ەش جاسىماڭىز، گۇلنۇر! قۇداي دا ادامعا كوتەرە الاتىن عانا قيىندىقتى بەرەدى، ءسىز ونى جەڭىپ شىعادى دەگەن سەنىممەن! قيىندىق تۇگىل، جاۋلارىڭىزدى دا جەڭىپ شىعارىڭىزعا ءبىز يمانداي سەنەمىز! ويتكەنى، ءسىز شىنىمەن مىقتىسىز!
ال كوپشىلىككە ايتارىم، گۇلنۇر وتە تالانتتى ءانشى. ال تالانتتى ادام كەز كەلگەن جەردە تالانتتى ەكەنىن دالەلدەيدى. ءالى گۇلنۇر بارلىقتارىڭنىڭ اۋىزدارىڭدى جابادى، ءوز ورنىندا وتىرعانىن دالەلدەيدى.
سوندىقتان ءبىز نۇرلان قويانبايەۆ سياقتى گۇلنۇر ورازىمبەتوۆا دا ءوز ورنىندا وتىر دەپ ەسەپتەيمىز. ناعىز ءوز ورنىنا ەندى كەلدى. بىلمەسەڭدەر، ءبىلىپ قويىڭدار، ونىڭ ورنى – ساحنا ەمەس، تەلارنا!
بۇرىنعى بۇرىنعى ما، تالانتىنىڭ ناعىز جارقىراي كورىنەتىن، قاۋىزداي اشىلاتىن كەزى كەلىپ تۇر. سوندىقتان وتتايتىندار وتتاي بەرسىن! قۇداي-اۋ، ءقازىر كىم نە ايتپاي جاتىر؟! ولاردىڭ سوزىنە قۇلاق اسساڭ ءومىر سۇرگىڭ كەلمەي كەتەدى. قولىڭنان كەلسە قونشىڭنان باس. مۇرىنىڭ باردا جاقسىلاپ ءسىڭبىرىپ قال!
«اركىم ءوز ورنىندا وتىرۋ كەرەك!» دەگەن وتتاعانداردىڭ اڭگىمەسى
نەمەنە، ەتىكشىلەردەن، كولىك جۇرگىزۋشىلەردەن، تىگىنشىلەردەن جۋرناليست شىقپايدى دەپ كىم ايتتى؟ شىققاندا قانداي؟ ءتىس دارىگەرى جۇرەككە وتا جاساي المايدى دەپ كىم ايتتى؟ ءاي، ول دا جوعارى وقۋ ورنىن بىتىرگەن كاسىبي مامان ەمەس پە؟ ونىڭ دا دارىگەر دەگەن اتى بار ەمەس پە؟ دارىگەردەن دارىگەردىڭ نەسى كەم؟ ءاي، اقىماقتار-اي، اۋىز وزىمدىكى ەكەن دەپ كوكي بەرەسىڭدەر عوي!
ويتكەنى، كەز-كەلگەن ادامنىڭ بويىندا تالانت بۇعىپ جاتادى. ال ونى بىرەۋلەر اشا الادى، ەكىنشىلەرى اشا الماي قور بولادى. سوندىقتان ونداي جاندارعا دا مۇمكىندىك بەرۋ كەرەك!. سوندىقتان ەرلان ءقاريننىڭ بۇل قادامىن مەن قوس قولداپ قولدايمىن! بۇل تەندەنسيانى ارى قاراي جالعاستىرا بەرۋ كەرەك! سوندا عانا ەلىمىز داميدى، گۇلدەنەدى.
قازاق تەلەديدارىنىڭ دا مارتەبەسى جوعارىلاپ، كەرەمەت، عاجايىپ شوۋلارعا، ءان مەن جىرعا، كۇلكىگە قارىق بولارىمىز انىق!
قايتا مەن ءوز تاراپىمنان مىنانداي ۇسىنىس ايتامىن: ەندى بىر-ەكى ايدان كەيىن گۇلنۇر ورازىمبەتوۆانى «قازاقستان» رترك» اق-نىڭ باسشىسى ەتىپ تاعايىنداۋ كەرەك! ال بۇعان سىزدەر قالاي قارايسىزدار؟
