[caption id="attachment_257027" align="aligncenter" width="508"]
Dýman Ramazan[/caption]
Qalamger Dýman Ramazannyń jazbasy bile-bilgenge taza sarkazm. Áleýmettik jelidegi paraqshasynda jazýshy kúni keshe ǵana "Tańsholpan" baǵdarlamasynyń dırektory bolyp taǵaıyndalǵan ánshi Gúlnur Orazymbetovany bylaısha aıtqanda maqtamen baýyzdapty. Basqasyn bilmeımiz, bizge solaı kórindi Ol ne deıdi sonda? Oqıyqshy.
Keremet tańdaý!
«Qazaqstan» RTRK» AQ-nyń jańa basshysy, saıasattanýshy Erlan Qarın myrza ánshi Gúlnur Orazymbetovany «Tańsholpan» baǵdarlamasynyń dırektory qylyp taǵaıyndapty. Nesi bar, óte keremet tańdaý. Erlan myrzanyń qandaı keremet tańdaý jasaǵanyna tań qalyp otyrmyn.
Gúlnur Orazymbetovanyń «Tańsholpandy» shyrq aınaldyratynyna senimim kámil. Endi kórermender ylǵı jaqsy habarlar kóretin bolady. Qazirdiń ózinde «Tańsholpanda» keremet jańalyqtar, tyń ózgerister bolyp jatyr. Kórmeıtinder, túıeni de kórmeıdi. Júz seksen gradýsqa ózgerdi. İshi kúıgender tuz jalaı bersin, Buryn ony eshkim de qaramaýshy edi, óte nashar bolatyn. Al Gúlnur kelgeli «Tańsholpan» jalpy halyqtyq baǵdarlamaǵa aınalyp kele jatyr. Óıtkeni, Gúlnur Orazymbetovany óte bilimdi, óz isiniń bilgiri, kásibı maman dep esepteımin.
Onyń qolynan bári keledi. Qyzyqsyńdar ózderiń!..
Qyzǵanshaqtar
Al qazir talantty ánshini kóre almaıtyndar, qyzǵanshaqtar, ishi tarlar, topshyldar ony bul qyzmetke laıyq emes dep shýlasyp jatyr. Aıtsa, aıta bersin! Qyrtatyndar qyrta bersin! El ne demeıdi! «It úre beredi, kerýen kóshe beredi!»
Esh jasymańyz, Gúlnur! Qudaı da adamǵa kótere alatyn ǵana qıyndyqty beredi, siz ony jeńip shyǵady degen senimmen! Qıyndyq túgil, jaýlaryńyzdy da jeńip shyǵaryńyzǵa biz ımandaı senemiz! Óıtkeni, siz shynymen myqtysyz!
Al kópshilikke aıtarym, Gúlnur óte talantty ánshi. Al talantty adam kez kelgen jerde talantty ekenin dáleldeıdi. Áli Gúlnur barlyqtaryńnyń aýyzdaryńdy jabady, óz ornynda otyrǵanyn dáleldeıdi.
Sondyqtan biz Nurlan Qoıanbaev sıaqty Gúlnur Orazymbetova da óz ornynda otyr dep esepteımiz. Naǵyz óz ornyna endi keldi. Bilmeseńder, bilip qoıyńdar, onyń orny – sahna emes, telarna!
Burynǵy burynǵy ma, talantynyń naǵyz jarqyraı kórinetin, qaýyzdaı ashylatyn kezi kelip tur. Sondyqtan ottaıtyndar ottaı bersin! Qudaı-aý, qazir kim ne aıtpaı jatyr?! Olardyń sózine qulaq assań ómir súrgiń kelmeı ketedi. Qolyńnan kelse qonshyńnan bas. Murynyń barda jaqsylap sińbirip qal!
«Árkim óz ornynda otyrý kerek!» degen ottaǵandardyń áńgimesi
Nemene, etikshilerden, kólik júrgizýshilerden, tiginshilerden jýrnalıs shyqpaıdy dep kim aıtty? Shyqqanda qandaı? Tis dárigeri júrekke ota jasaı almaıdy dep kim aıtty? Áı, ol da joǵary oqý ornyn bitirgen kásibı maman emes pe? Onyń da dáriger degen aty bar emes pe? Dárigerden dárigerdiń nesi kem? Áı, aqymaqtar-aı, aýyz ózimdiki eken dep kókı beresińder ǵoı!
Óıtkeni, kez-kelgen adamnyń boıynda talant buǵyp jatady. Al ony bireýler asha alady, ekinshileri asha almaı qor bolady. Sondyqtan ondaı jandarǵa da múmkindik berý kerek!. Sondyqtan Erlan Qarınniń bul qadamyn men qos qoldap qoldaımyn! Bul tendensıany ary qaraı jalǵastyra berý kerek! Sonda ǵana elimiz damıdy, gúldenedi.
Qazaq teledıdarynyń da mártebesi joǵarylap, keremet, ǵajaıyp shoýlarǵa, án men jyrǵa, kúlkige qaryq bolarymyz anyq!
Qaıta men óz tarapymnan mynandaı usynys aıtamyn: endi bir-eki aıdan keıin Gúlnur Orazymbetovany «Qazaqstan» RTRK» AQ-nyń basshysy etip taǵaıyndaý kerek! Al buǵan sizder qalaı qaraısyzdar?
