گرۋزييا 2026 جىلدىڭ شٸلدە ايىندا قازاقستاننان العاش رەت مۇناي يمپورتتادى. جەتكٸزٸلگەن مۇناي كٶلەمٸ 5,5 مىڭ توننا بولىپ, ونىڭ جالپى قۇنى 3,2 ميلليون دوللار بولعان. وسىلايشا قازاقستاندىق مۇنايدىڭ بٸر تونناسىنىڭ ورتاشا باعاسى شامامەن 582 دوللاردى قۇرادى, دەپ حابارلايدى dalanews.kz.
سالىستىرۋ ٷشٸن ايتساق, سول ايدا گرۋزييا رەسەيدەن 87,4 مىڭ توننا مۇناي ساتىپ العان. رەسەيلٸك مۇناي يمپورتىنىڭ جالپى قۇنى 36,4 ميلليون دوللار بولىپ, بٸر تونناسىنىڭ ورتاشا باعاسى 416 دوللاردى قۇراعان. بۇل قازاقستاندىق مۇنايدان شامامەن 166 دوللارعا ارزان.
ساراپشىلاردىڭ پٸكٸرٸنشە, قازاقستان مۇنايى الداعى ۋاقىتتا رەسەيدەن كەلەتٸن جەتكٸزٸلٸمدەردٸ الماستىراتىن بالامالاردىڭ بٸرٸ بولۋى مٷمكٸن. ٶيتكەنٸ 2027 جىلدىڭ 25 قاڭتارىنان باستاپ گرۋزيياداعى كۋلەۆي مۇناي ٶڭدەۋ زاۋىتى ەۋرووداقتىڭ 21-سانكتسييالار پاكەتٸنٸڭ تالاپتارىنا سەيكەس رەسەيلٸك مۇنايدى ٶڭدەۋدەن باس تارتۋى تيٸس.
سونىمەن قاتار زاۋىت شيكٸزات جەتكٸزۋدٸڭ ٶزگە باعىتتارىن دا قاراستىرىپ جاتىر. تامىز ايىندا ليۆييادان مۇناي يمپورتتاۋ جوسپارلانعان. بۇعان دەيٸن كەسٸپورىننىڭ قازاقستان مەن تٷرٸكمەنستاننان مۇناي جەتكٸزۋگە قىزىعۋشىلىق تانىتىپ وتىرعانى حابارلانعان.
