بۇعان دەيىن ءبىلىم جانە عىلىم ۆيسە-مينيسترى ەلميرا سۋحانبەردييەۆا ۇستالسا، وسىدان ءبىرشاما ۋاقىت بۇرىن ءبىلىم جانە عىلىم ءمينيسترىنىڭ كومەكشىسى 11 ملن. تەڭگە الدى دەگەن كۇدىككە ىلىنگەن بولاتىن. ال ەندى عىلىمدى دامىتادى دەگەن «عىلىم قورىنىڭ» باسشىسى ۇستالدى.
كۇنى كەشە عانا نۇر-سۇلتان قالاسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وكىلى ارمان بەردالين «عىلىم قورىنىڭ» باسشىسى جەمقورلىق ىسىنە شاتىلىپ، كۇدىككە ىلىنگەنىن العا تارتتى.
– «عىلىم قورى» اق-نىڭ باسقارما ءتوراعاسى عىلىمي جوبالاردى قارجىلاندىرۋ ءۇشىن ەلىمىزدەگى جوعارى وقۋ ورنىنىڭ رەكتورىنان 5 مىڭ دوللار كولەمىندە پارا العانى جايىندا كۇدىكتەلۋدە، – دەدى اگەنتتىك قىزمەتكەرى.
اگەنتتىكتىڭ تاراتقان مالىمەتىنە سۇيەنسەك، «عىلىم قورىنىڭ» باسشىسى ءوزىنىڭ كىناسىن تولىق مويىنداماعاندىقتان، قازىرگى تاڭدا تەرگەۋ جۇمىستارى ءجۇرىپ جاتقانى بەلگىلى بولدى.
وسىلايشا ەرلان ساعادييەۆ مينيستر بولعان تۇستا تاعايىندالعان كادرلاردىڭ بىلىقتارى شەتىنەن اشىلىپ جاتىر. وسىندايدا ساعادييەۆ جاۋاپتى قىزمەتتەردى قانداي ادامدارعا سەنىپ تاپسىرعانىن ءبىلدى مە ەكەن دەگەن ساۋال تۋىندايتىنى انىق.
