يورگ كۋكيستىڭ ايتۋىنشا، نەمىستەر 1 تامىزدان باستاپ رەسەيدەن كومىر ساتىپ الۋدى كۇرت توقتاتسا، مۇنايدى 1 جەلتوقساننان باستاپ توقتاتپاقشى.
گەرمانيانىڭ قارجى ءمينيسترى ەڭ قيىن كەزەڭ الدا ەكەنىن اتاپ ءوتتى. ول ءبىرقاتار ەۋرووداق ەلدەرى رەسەيدەن الداعى ۋاقىتتا 158 ملرد تەكشەمەتر گاز ساتىپ الۋىن توقتاتقاندا، كوپتەگەن قيىندىقتار تۋىنداۋى مۇمكىن ەكەنىن جاسىرمادى.
بۇگىندە رەسەي گەرمانياعا قاجەتتى كومىردىڭ 40%-ىن، مۇنايدىڭ دا 40%-ىن تاسىمالداپ وتىرعانى بەلگىلى. از عانا ۋاقىت ىشىندە وگىزدى دە ولتىرمەي، اربانى دا سىندىرماي تىعىرىقتان شىعۋ نەمىس بيلىگىنە ۇلكەن سىن بولىپ تۇر.
قازىرگى تاڭدا گەرمانيا سۇيىتىلعان گازدى قابىلدايتىن تەرمينالداردى كەڭەيتۋ ىسىمەن قارقىندى تۇردە اينالىسىپ جاتىر. وسىلايشا ولار رەسەي گازىنا تاۋەلدىلىكتەن قۇتىلۋدىڭ امالىن قاراستىرۋدا.
الداعى ۋاقىتتا كاتار مەن اقش ەۋروپاعا 30 ملرد تەكشەمەتر سۇيىتىلعان گاز جەتكىزۋگە كوزدەپ وتىر. وسىلايشا ەۋرووداق ەلدەرى قىستىڭ كوزى قىراۋدا پۋتين گاز قۇبىرىنىڭ شۇمەگىن كەرى بۇراپ قويۋىنان قاۋىپتەنىپ، قازىردەن باستان قامدانىپ جاتىر.
