ۋكراينادا قازاقستاندىق وپپوزيسيونەر ايدوس سادىقوۆقا قاستاندىق جاسالعان ەدى. ەر ادام ايەلىمەن بىرگە كولىگىنە جاقىنداعاندا بەلگىسىز بىرەۋ تاپانشامەن اتىپ كەتكەن. جاپا شەككەن قازاقستاندىق بەلسەندى ايدوس سادىقوۆ ەكەنى بەلگىلى بولدى. وسى ورايدا «Qasqa Jol» يۋتۋب-ارناسى ماسەلەنىڭ ءتۇيىنىن تارقاتۋ ءۇشىن شۇعىل شىعارىلىم دايىندادى. قوناقتا بولعان بەلگىلى ساياساتكەر قازبەك مايگەلدينوۆ ايدوس سادىققا كىمنىڭ وشتەسكەنىن بولجاپ كوردى، دەپ حابارلايدى Dalanews.kz اقپارات اگەنتتىگى.
قازبەك مايگەلدينوۆ ۋكراينا ءۇشىن ايدوس سادىققا شابۋىل جاساۋ قانشالىقتى ءتيىمدى دەگەن ساۋالعا جاۋاپ بەردى. ونىڭ ايتۋىنشا، جۋرناليسكە شابۋىلدىڭ ارتىندا قانداي دا ءبىر گەوساياسي ويىن تۇرۋى مۇمكىن. ولاي دەپ ايتۋعا سەبەپ تە بار.
«كارانتين كەزىن ەسكە ءتۇسىرىپ كورەيىك. توتەنشە جاعداي ەمەس، جاي عانا كارانتين رەجيمىندە دۇكەنگە شىعۋ مۇڭ بولدى. ال ەندى كييەۆتى ەسكە الايىق. كارانتين مەن كومەندانتتىق ۋاقىتتان بولەك كۇندەلىكتى توتالدى باقىلاۋدا وتىرعان قالا. ءالى كۇنگە دەيىن قىلمىسكەردىڭ ۇستالماۋىنا قاراعاندا وسىنداي قاتاڭ تەكسەرىستە تۇرعان قالادا وعان قاشىپ كەتۋگە قالاي جاعداي جاسالعان؟ وسى تۇستا ارنايى دايىندالعان وپەرسيا بولۋى مۇمكىن دەگەن وي تۋىندايدى. وسىدان ەكى اپتا بۇرىن ويدا جوقتا زەلەنسكيي ورتالىق ازيا جۋرناليستەرىن سۇحبات بەرۋگە شاقىردى. سوعىس بولىپ جاتقان ەلدىڭ باسشىسى الەمدىك دەڭگەيدەگى ەمەس، ورتالىق ازيا مەملەكەتتەرىنىڭ تىلشىلەرىن شاقىردى. ونىڭ ۇستىنە ءبىزدىڭ ەلدەن مەملەكەتتىك باق-تىڭ جۋرناليستەرىن نەمەسە قارالىمى جاعىنان جوعارى اۋديتوريا جيناي الاتىنداردى شاقىرعان جوق. وسىدان بارلىعىن قۇراستىراتىن بولساق ۋكراينانىڭ كوزدەگەن ءبىر مۇددەسى بار. جۋرناليستەردى شاقىرۋ مەن جۋرناليسكە شابۋىلدىڭ اراسىندا ءبىر بايلانىس بار سياقتى، مۇنىڭ ءبارى جايدان جاي بولىپ جاتقان جوق. فاكت بار. ەگەر وزبەكستان مەن قىرعىزستاندا دا وسىنداي جاعداي بولاتىن بولسا، ورتالىق ازيا گەوساياسي ويىننىڭ ءبىر ەلەمەنتىنە اينالىپ وتىر دەگەن وي تۋىندايدى».
ساياساتكەردىڭ سوزىنشە بۇل جەردە قانداي دا اسىعىس شەشىم شىعارۋعا بولمايدى.
«ارانداتۋشىلىققا جول بەرمەۋىمىز كەرەك. تۇراقتىلىعىمىز بار بولسا سىرتقى كۇشتىڭ ىرىتكى سالۋىنا جاعداي جاسامايىق. ول ءۇشىن اقپاراتتىق سوعىستا اقتى اق، قارانى قارا دەپ كورسەتە ءبىلۋىمىز ماڭىزدى. قانداي جاعدايدا، نە ءۇشىن، نەندەي ماقساتپەن دەگەن سۇراقتاردى جان-جاقتى قاراستىرىپ بارىپ شەشىم شىعارۋىمىز ماڭىزدى. ەشقانداي اسىعىس شەشىم قابىلداۋعا بولمايدى».
سۇحباتپەن تولىق تانىسۋ ءۇشىن مىنا سىلتەمەدەن ءوتىڭىز: كييەۆتە توتالدى باقىلاۋ، تاپا-تال تۇستە ادامدى اتىپ كەتۋ مۇمكىن ەمەس – قازبەك مايگەلدينوۆ
