وقۋ-اعارتۋ ءمينيسترى عاني بەيسەمبايەۆ تۇركىستان وبلىسىنا جۇمىس ساپارى اياسىندا ءبىرقاتار ءبىلىم بەرۋ نىساندارىن ارالادى. ول تەحنيكالىق جانە كاسىپتىك ءبىلىم بەرۋ جۇيەسىنىڭ دامۋىنا ەرەكشە كوڭىل ءبولدى، - دەپ حابارلايدى Dalanews.kz
تۇركىستان جوعارى كوپسالالى، قولونەر كوللەدجى — وڭىردەگى شەجىرەلى وقۋ ورىندارىنىڭ ءبىرى. بۇل وقۋ ورنىندا بولاشاق قولونەرشىلەر، قىش شەبەرلەرى، زەرگەرلەر، IT ماماندارى دايارلانۋدا جانە «جاس مامان» جوباسى اياسىندا «IT»، «قولونەر» ماماندىقتارى بويىنشا رەسپۋبليكالىق دەڭگەيدەگى قۇزىرەتتىلىك ورتالىقتارى جۇمىس ىستەيدى. كوللەدجدە ستۋدەنتتەر 11 ماماندىق، 13 بىلىكتىلىك بويىنشا ءبىلىم الادى.
مينيستر ۇجىممەن كەزدەسۋدە مەملەكەت باسشىسىنىڭ تاپسىرماسىنا سايكەس تەحنيكالىق جانە كاسىپتىك ءبىلىم بەرۋ جۇيەسىن جاڭا فورماتتا دامىتۋعا قاتىستى نەگىزگى مىندەتتەردى اتاپ ءوتتى.
«بيىلدان باستاپ كوللەدجدەرگە جان باسىنا شاققانداعى قارجىلاندىرۋ كولەمى ەكى ەسەگە ارتادى. بۇل — وقۋ ورىندارىنىڭ ماتەريالدىق-تەحنيكالىق بازاسىن جاڭارتۋعا، سونداي-اق پەداگوگتەردىڭ كاسىبي بىلىكتىلىگىن ارتتىرۋعا، جاڭا تەحنولوگيالاردى ەنگىزۋگە جول اشادى. سونىمەن قاتار كوللەدجدەردىڭ وقۋ-وندىرىستىك بازاسىندا وندىرىلگەن ونىمدەردى نارىققا شىعارىپ، تابىس تابۋ مۇمكىندىگىن قاراستىرىپ جاتىرمىز. تۇسكەن قارجى وقۋ ورنىنىڭ دامۋىنا باعىتتالادى. كوللەدجدەر زامان تالابىنا ساي يكەمدەلىپ، زاماناۋي ينفراقۇرىلىممەن جابدىقتالعان، بىلىكتى ماماندارمەن قامتىلعان، سۇرانىسقا ساي ساپالى كادر دايارلايتىن ورتالىققا اينالۋى كەرەك. كوللەدجدەرگە ينۆەستيسيا تارتۋدا سەرىكتەستەرمەن ىنتىماقتاستىقتى ارتتىرۋ ماڭىزدى»، — دەدى مينيستر.
مينيستر سونداي-اق «جايلى مەكتەپ» ۇلتتىق جوباسى اياسىندا سالىنعان №33 مەكتەپتە بولدى. وڭىردە 29 جايلى مەكتەپتىڭ قۇرىلىسى جۇرگىزىلۋدە. قازىرگى ۋاقىتتا ونىڭ ىشىندە 13 مەكتەپ پايدالانۋعا بەرىلگەن. مينيستر پەداگوگيكالىق قۇرام مەن وقۋ پروسەسىن ۇيىمداستىرۋ ساپاسىن كۇشەيتۋدى تاپسىردى.
قازىرگى ۋاقىتتا ءوڭىر حالقىنا ءبىلىم بەرۋ جۇيەسىندە 50 كوللەدج، 1100-دەن استام مەكتەپ پەن 1426 بالاباقشا قىزمەت كورسەتەدى. بيىل كوللەدجدەرگە 15 مىڭنان استام مەملەكەتتىك گرانت ءبولىنىپ، اگروحيميا، ليفت شارۋاشىلىعى، ۇشۋ اپپاراتتارىنىڭ وپەراتورى، جىلىجاي شارۋاشىلىعى سەكىلدى جاڭا 11 جۇمىسشى ماماندىعىنا ليسەنزيا الىنعان.
