Fitch Ratings رەيتينگتىك اگەنتتىگى قازاقستاننىڭ BBB دەڭگەيىندەگى تاۋەلسىز كرەديتتىك رەيتينگىن راستادى، بولجام – «تۇراقتى». بۇل تۋرالى ۇلتتىق ەكونوميكا مينيسترلىگى حابارلادى، دەپ جازادى Dalanews.kz.

اگەنتتىك رەيتينگتى ساقتاۋدىڭ نەگىزگى فاكتورلارى ق ر ۇلتتىق قورىنىڭ ۆاليۋتالىق اكتيۆتەرى مەن ۇلتتىق بانكتىڭ التىن-ۆاليۋتا رەزەرۆتەرىن قوسا العاندا، تازا سىرتقى اكتيۆتەردىڭ جوعارى دەڭگەيى، مەملەكەتتىك قارىزدىڭ تومەن دەڭگەيى، بىرتىندەپ فيسكالدىق شوعىرلاندىرۋدى جۇرگىزۋ، قارجىلاندىرۋداعى يكەمدىلىك، تۇراقتى ەكونوميكالىق ءوسۋ جانە قالىپتى گەوساياسي تاۋەكەلدەر بولىپ تابىلاتىنىن اتاپ ءوتتى.

تەڭىز كەن ورنىن (تكو) كەڭەيتۋ ەسەبىنەن مۇناي ءوندىرۋدىڭ جوعارى كولەمى مۇناي باعاسىنىڭ تومەندەۋىنىڭ اسەرىن ايتارلىقتاي وتەيتىنى اتاپ ءوتىلدى. اگەنتتىكتىڭ پىكىرىنشە، سالىق كودەكسىنە رەفورمالار جۇرگىزۋ ورتا مەرزىمدى پەرسپەكتيۆادا فيسكالدىق تاپشىلىقتى قىسقارتۋعا مۇمكىندىك بەرەدى. كەپىلدەندىرىلگەن مىندەتتەمەلەردى قوسا العاندا، مەملەكەتتىك قارىزدىڭ جىو-گە قاتىناسى تۇراقتى بولىپ قالادى دەپ بولجانۋدا.

جالعاسىپ جاتقان بيۋدجەتتىك جانە كۆازي-بيۋدجەتتىك قولداۋدىڭ ارقاسىندا ەكونوميكانىڭ شيكىزاتتىق ەمەس سەكتورى ەكونوميكا قۇرىلىمىنا تۇراقتى ۇلەستى قامتاماسىز ەتۋدى جالعاستىرۋدا.

سونىمەن قاتار Fitch اقش-پەن 25%-دىق تاريفتەردىڭ ەنگىزۋى ەلدىڭ سىرتقى ساۋداسىنىڭ جالپى قۇرىلىمىنداعى اقش-تىڭ تومەن ۇلەسىنە بايلانىستى قازاقستان ەكونوميكاسىنا ايتارلىقتاي اسەر ەتپەيتىنىن اتاپ ءوتتى.

سونىمەن قاتار، اگەنتتىك قايتالاما سانكسيالاردىڭ تومەن تاۋەكەلدەرىن اتاپ وتەدى.