ەۋرووداق شەكاراسىندا قازاقستاننان جونەلتىلگەن سۇيىتىلعان مۇناي گازى (سمگ) تيەلگەن جۇزدەن استام سيستەرنا تۇرىپ قالدى. بۇل تۋرالى Dalanews.kz ءتىلشىسى مۇناي-گاز سالاسىنىڭ ساراپشىسى ولەگ چەرۆينسكييدىڭ مالىمەتىنە سىلتەمە جاساپ حابارلايدى.
ەۋرووداق "رەسەيلىك گاز بولۋى مۇمكىن" دەگەن كۇدىكپەن تەكسەرۋدى كۇشەيتكەن
ساراپشىنىڭ ايتۋىنشا، پولشا مەن بەلارۋس شەكاراسىنداعى برەست-ورتالىق، برەست-شىعىس جانە بارانوۆيچي-ورتالىق شەكارالىق بەكەتتەرىندە "تەڭىزشيەۆرويل" وندىرگەن سۇيىتىلعان گاز تيەلگەن كەمى 100-دەن استام ۆاگون-سيستەرنا جينالىپ قالعان. پولشا كەدەنشىلەرى گازدىڭ ناقتى قازاقستاندا وندىرىلگەنىن راستايتىن قۇجاتتاردى سۇراتۋدا. سەبەبى ەو 2024 جىلدان باستاپ رەسەيلىك سمگ-نىڭ تاسىمالىنا تىيىم ەنگىزگەن. ەندى رەسەيگە ىرگەلەس ەلدەردەن كەلەتىن كەز كەلگەن سمگ كۇشەيتىلگەن تارتىپتە تەكسەرىلەدى.
"قازاقستاننىڭ "سانكسيالاردى اينالىپ وتۋگە كومەكتەسەدى" دەگەن كۇدىككە ىلىگۋى كەدەرگى كەلتىرۋدە. ەۋرووداق كەدەن ورگاندارى "قازاق گازى" دەگەن اتپەن رەسەيدە وندىرىلگەن گاز تاسىمالدانۋى مۇمكىن دەپ قاۋىپتەنەدى"، — دەيدى ساراپشى ولەگ چەرۆينسكيي.
"تەڭىزشيەۆرويل" جۇمىسىنا اسەر ەتۋى ىقتيمال
قازاقستاندىق سمگ-نىڭ ەۋروپاعا وتە الماۋى سالدارىنان بوس ۆاگون-سيستەرنالار تاپشىلىعى بايقالىپ جاتىر. بۇل "تەڭىزشيەۆرويل" سياقتى ءىرى وندىرۋشىلەردىڭ تاسىمالىنا اسەر ەتۋى مۇمكىن.
"بريۋسسەلدەگى قازاقستان ەلشىلىگى ەو-نىڭ سانكسيالارعا جاۋاپتى كوميسسارىمەن ءتۇسىندىرۋ جۇمىستارىن جۇرگىزىپ جاتىر. الايدا ازىرگە ناتيجە جوق"، — دەيدى چەرۆينسكيي.
رەسەيگە قارسى جاڭا سانكسيالار: قازاقستاندا بەنزين قىمباتتاۋى مۇمكىن
بۇعان دەيىن رەسەيگە قارسى جاڭا سانكسيالاردىڭ كەسىرىنەن قازاقستاندا جانارماي باعاسى ءوسۋى مۇمكىن ەكەنى حابارلانعان. ويتكەنى شەكتەۋلەر «گازپرومنەفت» كومپانياسىنىڭ ەنشىلەس كاسىپورنىنا دا تىكەلەي قاتىستى، ال ونىڭ قازاقستاندا ءوز جانارماي قۇيۋ بەكەتتەر جەلىسى بار.
