Euronews جۋرناليستەرى 24 ساعاتتىق ەرەۋىل جاريالادى. ولار تەلەارنا باسشىلىعى جاپقىسى نەمەسە قىسقارتقىسى كەلگەن ۋكراين، پارسى جانە اراب قىزمەتتەرىنە وسىلايشا قولداۋ ءبىلدىردى.
ەرەۋىل 15 جەلتوقساندا تۇندە باستالدى. جۋرناليستەر، ولاردى قولداعان تەحنيكالىق قىزمەت بۇل كۇنى جاڭالىقتار دايىندامايدى. كورپوراسيا قىزمەتكەرلەرى باسشىلىقتىڭ قارجى تاپشىلىعىنا بايلانىستى كەلەسى جىلدىڭ ساۋىرىندە ۋكراين رەداكسياسىن قىسقارتۋ تۋرالى جوسپارىنا قارسى.
5 جەلتوقساندا Euronews جۋرناليستەرى تەلەارنا تاريحىندا ءبىرىنشى رەت ەرەۋىل وتكىزدى. سول كەزدە ولار باسشىلىقتى سەنزۋرا مەن اقپاراتتى بۇرمالاپ تاراتتى دەپ ايىپتادى.
2015 جىلدىڭ اقپانىنان باستاپ Euronews اكسياسىنىڭ جارىمى ەگيپەتتىك ميللياردەر ناگيب ساۆيريستىڭ باقىلاۋىنا ءوتتى. كاسىپكەر ونى ەگيپەتكە رەسەي پرەزيدەنتى ۆلاديمير پۋتين كەلىپ كەتكەننەن كەيىن ساتىپ الدى. سول سەبەپتى جۋرناليستەر رەداكسيا ساياساتى مەن تەلەارنانىڭ تاۋەلسىزدىگىنە قاتىستى قاۋىپتەرىن جاسىرماي ايتا باستادى. قازىرگى تاڭدا Euronews اكسيالارىنىڭ ەلەۋلى بولىگىن امەريكالىق NBC News كورپوراسياسىنا ساتۋ تۋرالى كەلىسسوزدەر ءجۇرىپ جاتىر.
