«قازاقتەلەكوم»، Sulpak جانە تەحنودوم قازاقستانداعى جۇمىس ىستەۋگە ەڭ قولايسىز كومپانيالار تىزىمىنە ەندى.

بۇل تۋرالى People Consulting كومپانياسىنىڭ ماماندارى جۇرگىزگەن زەرتتەۋ ناتيجەسىندە بەلگىلى بولدى دەپ جازادى Dalanews.kz.

زەرتتەۋشىلەر ەلدەگى IT جانە digital ماماندار اراسىندا ساۋالناما جۇرگىزىپ، ولاردىڭ قاي كومپانيالاردا جۇمىس ىستەگىسى كەلەتىنىن جانە قاي جەرگە مۇلدە بارعىسى كەلمەيتىنىن انىقتاعان.

انتيرەيتينگكە قىزمەتكەرلەرگە تولەنەتىن تومەن جالاقى، ۇجىمداعى جاعىمسىز اتموسفەرا جانە كومپانيا باسشىلىعىنىڭ ناشار بەدەلى باستى سەبەپ بولعان.

وسىلايشا، ەڭ ناشار جۇمىس بەرۋشىلەر ءتىزىمىنىڭ ونىنشى ورنىنا تەحنيكا ساتاتىن «تەحنودوم» جەلىسى جايعاسقان. ودان كەيىن Bereke Bank، RBK Bank جانە Halyk Bank سياقتى بىرنەشە بانك ورنالاسقان.

انتيرەيتينگتىڭ التىنشى ورنىنا MagnumGO ازىق-تۇلىك جەتكىزۋ قىزمەتى، بەسىنشى ورىنعا رەسەيلىك تولەم جۇيەسى Qiwi جايعاستى.

«تەحنودوممەن» تاعدىرلاس تاعى ءبىر تۇرمىستىق تەحنيكا ساتاتىن كومپانيا – «مەچتا» دۇكەندەر جەلىسى ءتورتىنشى ورىننان كورىندى.

ۇزدىك ۇشتىكتى ينتەرنەت-پروۆايدەر «قازاقتەلەكوم» باستاپ بەردى. ەكىنشى ورىندى – Sulpak دۇكەندەر جەلىسى يەلەنسە، IT جانە digital ماماندارىنىڭ پىكىرىنشە، قازاقستانداعى ەڭ ناشار جۇمىس بەرۋشى كومپانيا – Eurasian Bank اتانعان. مۇندا ساۋالناماعا قاتىسۋشىلار جۇمىس شارتتارى مەن اتموسفەراسى مۇلدە توزگىسىز ەكەنىن اتاپ كورسەتكەن.

وسى جايىندا شولۋ جاساعان جەلى بەلسەندىسى ايعالي تويجاننىڭ ايتۋىنشا، ەل اجەپتاۋىر رەپۋتاسياسى بار دەپ سانايتىن كومپانيالاردىڭ كوپشىلىگىندە ىشكى اۋرا دۇرىس ەمەس.

"سونىڭ ىشىندە تومەن جالاقى، جاعىمسىز جۇمىس ورتاسى، كاسىبي دامۋدىڭ جوقتىعى، جۇمىس بەرۋشى بەدەلىنىڭ ناشارلىعى جانە ىشكى تۇراقسىزدىق اتالعان كومپانيالاردىڭ وسىنداي تىزىمگە ەنۋىنە سەبەپشى بولدى"، - دەيدى ول.

انتيرەيتينگكە ەنگەن توپ-10 كومپانيانىڭ ءتىزىمى كەلەسىدەي:

1. Eurasian Bank

2. Sulpak 

3. قازاقتەلەكوم

4. Mechta Market 

5. Qiwi 

6. MagnumGO E-Commerce 

7. Halyk Bank 

8. Bank RBK 

9. Bereke Bank

10. Technodom