«Qazaqtelekom», Sulpak jáne Tehnodom Qazaqstandaǵy jumys isteýge eń qolaisyz kompaniialar tizimine endi.
Bul týraly People Consulting kompaniiasynyń mamandary júrgizgen zertteý nátijesinde belgili boldy dep jazady Dalanews.kz.
Zertteýshiler eldegi IT jáne digital mamandar arasynda saýalnama júrgizip, olardyń qai kompaniialarda jumys istegisi keletinin jáne qai jerge múlde barǵysy kelmeitinin anyqtaǵan.
Antireitingke qyzmetkerlerge tólenetin tómen jalaqy, ujymdaǵy jaǵymsyz atmosfera jáne kompaniia basshylyǵynyń nashar bedeli basty sebep bolǵan.
Osylaisha, eń nashar jumys berýshiler tiziminiń onynshy ornyna tehnika satatyn «Tehnodom» jelisi jaiǵasqan. Odan keiin Bereke Bank, RBK Bank jáne Halyk Bank siiaqty birneshe bank ornalasqan.
Antireitingtiń altynshy ornyna MagnumGO azyq-túlik jetkizý qyzmeti, besinshi orynǵa reseilik tólem júiesi Qiwi jaiǵasty.
«Tehnodommen» taǵdyrlas taǵy bir turmystyq tehnika satatyn kompaniia – «Mechta» dúkender jelisi tórtinshi orynnan kórindi.
Úzdik úshtikti internet-provaider «Qazaqtelekom» bastap berdi. Ekinshi oryndy – Sulpak dúkender jelisi ielense, IT jáne digital mamandarynyń pikirinshe, Qazaqstandaǵy eń nashar jumys berýshi kompaniia – Eurasian Bank atanǵan. Munda saýalnamaǵa qatysýshylar jumys sharttary men atmosferasy múlde tózgisiz ekenin atap kórsetken.
Osy jaiynda sholý jasaǵan jeli belsendisi Aiǵali Toijannyń aitýynsha, el ájeptáýir repýtatsiiasy bar dep sanaityn kompaniialardyń kópshiliginde ishki aýra durys emes.
"Sonyń ishinde tómen jalaqy, jaǵymsyz jumys ortasy, kásibi damýdyń joqtyǵy, jumys berýshi bedeliniń nasharlyǵy jáne ishki turaqsyzdyq atalǵan kompaniialardyń osyndai tizimge enýine sebepshi boldy", - deidi ol.
Antireitingke engen TOP-10 kompaniianyń tizimi kelesidei:
1. Eurasian Bank
2. Sulpak
3. Qazaqtelekom
4. Mechta Market
5. Qiwi
6. MagnumGO E-Commerce
7. Halyk Bank
8. Bank RBK
9. Bereke Bank
10. Technodom
