ەشقاشان قوناققا قوڭىراۋ شالماي تۇرىپ بارماڭىز. ەگەر ءسىزدىڭ ۇيگە ەسكەرتپەي قوناق كەلسە، وندا حالاتپەن جۇرە بەرۋىڭىزگە بولادى. قوناقتار تۋرالى: اياق كيىمدى شەش دەۋگە بولمايدى. بۇل – جونسىزدىك. قوناق ءوزى تازا كىلەمدى كورسە، جاۋىن كەشىپ كەلىپ تۇرسا، اياعىن شەشىپ كىرەدى.
قولشاتىردى ەشقاشان اشىپ كەپتىرمەيدى. كەڭسەدە دە، قوناقتا دا. ونى جيناپ، ارناۋلى سالعىشىنا سالىپ قويادى. نەمەسە جاي عانا ىلگىشكە ءىلىپ قوياسىز.
پورتفەلدى جەرگە قويادى. ەركەك ادام ەشقاشان جانىنداعى ايەل زاتىنىڭ سومكەسىن ۇستاماۋى كەرەك. ايەلدىڭ پالتوسىن تەك ىلگىشكە ءىلۋ ءۇشىن عانا قولىنا الادى.
ۇيكيىم – شالبار مەن جەمپىر، ىڭعايلى، جايلى، ادام كورۋگە لايىقتى كيىمدى ايتادى. ال، حالات، جاتاردا كيەتىن ىشكويلەك دەگەن تاڭەرتەڭ جۋىناتىن بولمەگە دەيىن، كەشكە جۋىناتىن بولمەدەن جاتىن بولمەگە دەيىن عانا كيىلەتىن كيىم.
بالاڭىز بولەك بولمەگە اۋىسقان سوڭ ەسىكتى تىقىلداتىپ كىرۋدى ۇيرەتىڭىز. ءوزىڭىز دە ونىڭ بولمەسىنە رۇقسات سۇراپ كىرىڭىز. سوندا ول ءسىزدىڭ جاتىن بولمەڭىزگە بەيبەرەكەت كىرمەيتىن بولادى.
مەيرامحاناعا بارعاندا تاپسىرىس بەرۋ ەرەجەسى: ەگەر ءسىز «مەن شاقىرامىن» دەسەڭىز، ارينە وندا ءسىز تولەيسىز. ەگەر ايەل ادام ىسكەر سەرىكتەسىن شاقىرسا، وندا ول ءوزى تولەيدى. «وندا مەيرامحاناعا بارالىق» دەگەن ءسوز شىقسا، اركىم وزىنە تولەيدى. تەك ەر ازامات ءوزى «مەن تولەيىن» دەسە، وندا كەلىسىم بەرۋىنە بولادى.
ەر ادام ليفتىگە ءبىرىنشى بولىپ كىرەدى. كىم ەسىكتىڭ كوزىنە جاقىن بولسا، سول ءبىرىنشى شىعادى.
كولىكتە ەڭ لايىقتى ورىن – جۇرگىزۋشىنىڭ ارتى ەسەپتەلەدى. ونى ايەل ادامعا بەرەدى. ەر ادام جانىنا وتىرادى. كولىكتەن شىققاندا قولىن سوزادى. ەگەر ەر ادام رولدە وتىرسا، وندا ايەل سونىڭ ارتىنا وتىرعانى ابزال. ايەل قايدا وتىرسا دا ەر ادام ەسىگىن اشىپ بەرىپ، قولىنان دەمەپ وتىرۋى كەرەك. ىسكەر ادامدار قاعيدالارىندا ەر ادامدار وسى ەرەجەنى كوپ بۇزادى. ولار فەمينيستەردىڭ ۇرانىن كوپ قولداناتىن بولعان: «كاسىپتە ەر مەن ايەل دەگەن جوق» دەگەن.
ەمدام قولدانىپ ءجۇرمىن دەپ ەلدىڭ كوزىنشە ايتۋ – ادەپسىزدىك. مۇنداي ءسوزدى جەلەۋ ەتىپ قوناققا بارعاندا تاماقتان باس تارتۋ تىپتەن سوراقىلىق. قوناققا بارعان كەزدە وتاناسىن ءدامدى تاعامدارى ءۇشىن ماقتاۋدى ۇمىتپاڭىز. ىشىمدىككە قاتىستى دا سولاي. نەگە ىشكىڭىز كەلمەيدى – ول ءسىزدىڭ ماسەلە. قۇرعاق شاراپ الدىرتىپ، الدىڭىزعا قويىپ قويىڭىز. ەرنىڭىزدى تيگىزسەڭىز دە جەتكىلىكتى.
12 جاسقا تولعان ءار بالاعا «ءسىز» دەپ ايتۋ شارت. مادەنيەتتى، زيالى قاۋىم وكىلدەرى داياشى، جۇرگىزۋشىلەرگە سەن دەۋى بارىپ تۇرعان كورگەنسىزدىك. ەتەنە جاقىندارىڭىزعا دا كەڭسەدە «ءسىز» دەڭىز. تەك ەكەۋارا قالعاندا عانا «سەنگە» كوشۋگە بولادى. ەگەر سۇحباتتاسىڭىز «سەن» دەپ قويماسا، «كەشىرىڭىز، ءسىز بۇنى ماعان ايتىپ جاتسىز با؟» دەپ سۇراڭىز. بۇنى دا ەلەمەسە، «مەنى مەڭزەپ تۇرسىز با؟» دەڭىز. سوسىن يىعىڭىزدى قيقايتىپ: «كەشىرىڭىز، ءبىز «سەنگە» كوشپەگەن ەدىك قوي» دەپ ايتۋعا بولادى.
قاسىڭىزدا جوق ادامدى ءسوز ەتۋ – ونى وسەكتەۋ دەگەن ءسوز. ولاي ەتۋگە بولمايدى. جاقىندارىڭىزدى ءسوز ەتۋگە دە بولمايدى. اسىرەسە، ەلدىڭ كوزىنشە كۇيەۋىن جامانداۋ دۇرىس ەمەس. ەگەر كۇيەۋى ناشار بولسا – نەگە ونىمەن اجىراسىپ كەتپەيسىز؟ سول سەكىلدى تۋعان جەر تۋرالى دا جاقتىرمايتىن ءسوز ايتۋعا بولمايدى. «بۇل ەل قايدا بارادى؟» دەۋ اعاتتىق. ءسىز دە سول ەلدە تۇرىپ جاتقان جوقسىز با؟
اۋدارعان شىنار ءابىلدا
