سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى ءماجىلىس دەپۋتاتى مۇرات ابەنوۆتىڭ Telegram مەسسەندجەرىندەگى بوتتارعا قاتىستى مالىمدەمەسىنە جاۋاپ بەردى، دەپ حابارلايدى Dalanews.kz.

ۆەدومستۆونىڭ حابارلاۋىنشا، حالىقتىڭ جەكە دەرەكتەرىن تاراتاتىن Telegram-بوتتارعا ارنايى تالداۋ جۇرگىزىلگەن.

مينيسترلىك زەرتتەۋ ناتيجەسىندە بۇل بوتتاردىڭ دەرەكتەرى بۇرىنعى ۋاقىتتاردا تارالعان ەسكى اقپاراتتار بازاسىنا، اشىق ينتەرنەت كوزدەرىنە جانە GetContact سياقتى ءۇشىنشى تاراپ پلاتفورمالارىنا نەگىزدەلگەنىن انىقتاعان. ايتا كەتۋ كەرەك، GetContact سەرۆيسىنە قازاقستان اۋماعىنان قولجەتىمدىلىك بۇعاتتالعان، سەبەبى وندا ەلىمىزدىڭ زاڭنامالارىن بۇزاتىن جايتتار تىركەلگەن.

انىقتالعان رەسۋرستار تۋرالى سىلتەمەلەر ۋاكىلەتتى ورگاندارعا جولدانىپ، تەكسەرۋ جانە زاڭعا ساي شارا قابىلداۋ تاپسىرىلعان. بۇعان دەيىن دە وسىنداي مازمۇنداعى 30-دان استام Telegram-بوتتىڭ قىزمەتى توقتاتىلعان.

مينيسترلىك ازاماتتارعا ەسكەرتۋ جاساپ، مۇنداي سەرۆيستەردى قولدانباۋعا جانە جەكە اقپاراتتى اشىق ورتادا جاريالاماۋعا كەڭەس بەرەدى. ۆەدومستۆو قۇقىق قورعاۋ ورگاندارىمەن بىرلەسىپ، ازاماتتاردىڭ جەكە دەرەكتەرىن قورعاۋ جانە ەلىمىزدەگى سيفرلىق قاۋىپسىزدىكتى قامتاماسىز ەتۋ بويىنشا جۇمىستى جالعاستىرا بەرەتىنىن مالىمدەدى.

ەسكە سالا كەتەيىك، بۇعان دەيىن دەپۋتات مۇرات ابەنوۆ Telegram-دا قازاقستان ازاماتتارىنىڭ ءجسن-ى، تۇرعىلىقتى مەكەنجايى، تەلەفون نومىرلەرى مەن وتباسى مۇشەلەرى تۋرالى اقپاراتتاردى ەش قيىندىقسىز بەرەتىن بوتتىڭ پايدا بولعانىن ايتىپ، دابىل قاققان بولاتىن. ونىڭ ايتۋىنشا، بۇل مالىمەتتەر مەملەكەتتىك اقپاراتتىق جۇيەلەردەن الىنعان.