Sıfrlyq damý, ınovasıalar jáne aeroǵarysh ónerkásibi mınıstrligi Májilis depýtaty Murat Ábenovtiń Telegram messendjerindegi bottarǵa qatysty málimdemesine jaýap berdi, dep habarlaıdy Dalanews.kz.

Vedomstvonyń habarlaýynsha, halyqtyń jeke derekterin taratatyn Telegram-bottarǵa arnaıy taldaý júrgizilgen.

Mınıstrlik zertteý nátıjesinde bul bottardyń derekteri burynǵy ýaqyttarda taralǵan eski aqparattar bazasyna, ashyq ınternet kózderine jáne GetContact sıaqty úshinshi tarap platformalaryna negizdelgenin anyqtaǵan. Aıta ketý kerek, GetContact servısine Qazaqstan aýmaǵynan qoljetimdilik buǵattalǵan, sebebi onda elimizdiń zańnamalaryn buzatyn jaıttar tirkelgen.

Anyqtalǵan resýrstar týraly siltemeler ýákiletti organdarǵa joldanyp, tekserý jáne zańǵa saı shara qabyldaý tapsyrylǵan. Buǵan deıin de osyndaı mazmundaǵy 30-dan astam Telegram-bottyń qyzmeti toqtatylǵan.

Mınıstrlik azamattarǵa eskertý jasap, mundaı servısterdi qoldanbaýǵa jáne jeke aqparatty ashyq ortada jarıalamaýǵa keńes beredi. Vedomstvo quqyq qorǵaý organdarymen birlesip, azamattardyń jeke derekterin qorǵaý jáne elimizdegi sıfrlyq qaýipsizdikti qamtamasyz etý boıynsha jumysty jalǵastyra beretinin málimdedi.

Eske sala keteıik, buǵan deıin depýtat Murat Ábenov Telegram-da Qazaqstan azamattarynyń JSN-i, turǵylyqty mekenjaıy, telefon nómirleri men otbasy músheleri týraly aqparattardy esh qıyndyqsyz beretin bottyń paıda bolǵanyn aıtyp, dabyl qaqqan bolatyn. Onyń aıtýynsha, bul málimetter memlekettik aqparattyq júıelerden alynǵan.