جۋرناليست بالا اسىراپ الۋ ىسىندە كوپ شيكىلىك، زاڭسىزدىق بولعانىن جەتكىزدى.
"بۇل سالادا (بالا اسىراپ الۋ - ەسك.) جەمقورلىق بولعانىن ەشكىم جوققا شىعارمايدى. ...ءبىر امەريكالىق اتا-انانىڭ ءوز اۋزىنان ءبىزدىڭ جاق اقشا تالاپ ەتكەنىن ەستىدىم. قۇجاتتار بويىنشا بارلىعى دۇرىس، ەشقانداي شيكىلىك تاپپايدى. ءتىپتى سول كەزدەگى ءبىلىم جانە عىلىم مينيسترلىگىنىڭ وزدەرى، بالا قۇقىعىن قورعاۋ كوميتەتى بولسىن، "ول جاققا تەك اۋرۋ بالالار كەتەدى" دەپ ايتتى عوي. ءبىراق اۋرۋ بالالار كەتىپ جاتقان جوق. نەلىكتەن؟ ويتكەنى ولاردىڭ مەديسينالىق پاراقشاسىنا ءتۇرلى-تۇرلى اۋرۋدى جازىپ قويادى. ...اراسىندا مۇگەدەك بالالار بار. مىسالى، 2009 جىلى بەلگيادا ءتۇسىرىپ كەلدىم. تالعات دەگەن بالا بولدى. سول بالانىڭ قولى شىنتاعىنان جوق بولدى. اقش-تا ءبىر قىز بالا بولدى، ەكى اياعى جوق. ءبىراق بارلىعى بىردەي اۋرۋ ەمەس. ەسەپسىز كەتكەن بالا وتە كوپ. حالىقتى تىنىشتاندىرىپ قويۋ ءۇشىن "شەتەلگە اۋرۋ بالالاردى بەرەمىز" دەگەن اقپارات بولدى. باعدارلامادان ەلدىڭ ءبارى ونىڭ بارلىعى اۋرۋ ەمەس ەكەنىن كورىپ جاتىر"، - دەيدى ول سۇحباتتا.
سونىمەن قاتار، باعدارلاما جۇرگىزۋشىسى "بالالار 4-5 مىڭ دوللارعا ساتىلعانى" جونىندە اقپارات بارىن ايتتى. ال جانار بايسەمىزوۆا 90-شى جىلداردىڭ اياعىندا بۇل سوما 50 مىڭ دوللار كولەمىندە بولعانىن ناقتىلادى.
"4-5 مىڭ دوللار دەگەن اقشا ەمەس قوي. سول كەزدەگىمەن 50 مىڭ دوللار. 90-شى جىلداردىڭ اياعى، 2000-ىنشى جىلدارى. ون شاقتى وتباسى كەلىپ، ءارقايسى 50 مىڭ دوللار بەرىپ، بالالاردى الىپ كەتكەن. ...مەندە جازىلعان (زاڭسىز كەتكەن بالالار تۋرالى دەرەكتەر - ەسك.)، ءبىراق ەفيرگە بەرگەن جوقپىن. زاڭسىزدىق وتە كوپ بولعان. ...اقىلىڭا سىيمايتىن دۇنيەلەر بولعان. شىنىن ايتقان كەزدە ءوزىڭ شوشىپ كەتەسىڭ. شەتەلدىكتەر نەگىزى زاڭدى ساقتايدى، ءبىزدىڭ ادامدارعا اقشا كەرەك بولدى"، - دەيدى جانار بايسەمىزوۆا.
