ۇكىمەت ساعاتىندا ءماجىلىس دەپۋتاتتارى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆكە شۇيلىكتى. مينيستر دەپۋتاتتارعا نەگە جاقپاي قالدى؟ Dalanews.kz تارقاتادى.

"قاشانعا دەيىن بيۋدجەتتىڭ اقشاسىن قۇمعا سىڭگىزىپ وتىرامىز؟"

ءماجىلىس دەپۋتاتى ەرلان سايروۆ سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆكە ساۋال جولدادى. ونىڭ ايتۋىنشا، ەلىمىزدىڭ اۋداندارىندا سۋ جەتىسپەيدى، ءالى كۇنگە دەيىن شەتەلدەن ۇلكەن قاراجاتقا سۋ ساتىپ الىپ وتىرمىز.

"ءسىزدىڭ ەسەبىڭىزدە قازاقستانداعى سۋ ماسەلەسىنىڭ جاعدايى وتە جاقسى، جايما شۋاق، ءبىراق ومىردە ولاي ەمەس قوي. ءقازىر قازاقستاننىڭ قاي ايماعى بولسا دا، شىعىس، باتىس، وڭتۇستىك - قاي جاعىندا دا سۋ جەتىسپەۋشىلىگى بار. مەن سىزگە ءبىر-اق مىسال كەلتىرەيىن. مىسال ءۇشىن باتىس قازاقستان وبلىسىندا كازتالوۆ اۋدانىندا سۋدى رەسەيدەن الىپ وتىر. قازسۋشار جىلىنا 5 ملرد تەڭگە بەرىپ، رەسەيدەن سۋ الادى.

ءبىراق سول سۋ كەلەدى دە، جالپاقتالدان ءوتىپ، ءارى قاراي قۇمعا ءسىڭىپ كەتەدى. سوندا جىلىنا بيۋدجەتتىڭ 5 ملرد تەڭگەسىن قۇمعا سىڭگىزىپ وتىرمىز. جالپاقتالدا سۋ قويماسىن سالۋ جوباسى وسىدان ون جىل بۇرىن باستالعان، ءالى اياقتالعان جوق. وسى ماسەلەنى قاشان شەشەسىزدەر؟ ءبىز قاشانعا دەيىن بيۋدجەتتىڭ اقشاسىن قۇمعا سىڭگىزىپ وتىرامىز؟" - دەدى ول.

سونىمەن قاتار، دەپۋتات سۋدى زاڭسىز پايدالانۋ ماسەلەسىن كوتەردى.

"وڭتۇستىكتەگى ەڭ ماڭىزدى ماسەلە - سۋدى زاڭسىز پايدالانۋ. ول دا قازسۋشاردىڭ مەنەدجمەنتىنە بايلانىستى. قازسۋشار جەرگىلىكتى ازاماتتارعا سۋدى وزدەرىنىڭ پارقىمەن زاڭسىز بەرەدى دەگەن اقپارات بار. وسى ماسەلەنى قاشان جوياسىزدار؟ جىلىنا سۋ رەسۋرستارىنىڭ قىرىق پايىزى زاڭسىز كەتەدى ەكەن... ءالى كۇنگە دەيىن قولىمىزدا بار سۋدى ۇنەمدەۋ مەحانيزمىن جاساعان جوقسىزدار"، - دەپ اشىندى سايروۆ.

"رەسەيدەن الىپ وتىرعانىمىز راس"

سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ دەپۋتاتتىڭ ايتقانى راس ەكەنىن، دەگەنمەن الداعى ۋاقىتتا بقو-دا ەكى سۋ قويماسى سالىناتىنىن، ال ءقازىر رەسەيمەن جىلدا كەلىسىمشارتقا وتىراتىندارىن ايتتى. ءمينيستردىڭ سوزىنشە، سەبەبى ونىڭ باسقا شەشۋ جولى جوق. 

"ەرتەڭ ەكى سۋ قويماسىن سوعامىز. سىيىمدىلىعى - 50-60 ملن تەكشە مەتر. ال ءبىز جىلىنا رەسەيدەن 350 ملن تەكشە مەتر الىپ جاتىرمىز. بۇل جالعاسىن تابادى. سەبەبى سول جەردە وتىرعان ەلدى سۋمەن قامتاماسىز ەتۋىمىز كەرەك. سۋ جەرگە كەتكەنىمەن باتىس قازاقستاننىڭ جەرىنە كەتىپ جاتىر، جالپى ەكولوگياعا ءبارىبىر اسەرىن بەرەدى. سوندىقتان بەكەر قاراجات ءبولىپ وتىرمىز دەپ ايتا المايمىز"، - دەدى شەنەۋنىك.

مينيستر زاڭسىز سۋ ساتۋ دەرەگى بارىن دا مويىندادى.

"ايتقانىڭىز راس. بۇكىل رەسپۋبليكا كولەمىندە قازسۋشار-مەن كەلىسىمشارت جاساماي، سۋ الۋ ماسەلەلەرى بار. قالاي شەشىپ جاتىرمىز؟ كەلىسىمشارتتاردى ەلەكترون تۇرگە كوشىرىپ جاتىرمىز. ودان بولەك ءوزىمىزدىڭ اقپاراتتىق تالداۋ ورتالىعى ارقىلى شارۋا قوجالىعى قانشالىق سۋ العانى، قانشا قاراجات ءتۇستى دەگەن جۇيەنى ەنگىزەيىن دەپ وتىرمىز. ول ءجۇز پايىز ماسەلەنى شەشپەيتىن شىعار، ءبىراق ۇلكەن قۇرال رەتىندە جاردەم كورسەتەدى"، - دەدى ول.

سونىمەن قاتار، شەنەۋنىك ارنايى كوميتەت قۇرىلعانىن، ونىڭ شتاتى ۇلعايتىلعانىن، بۇل باعىتتا كادر ماسەلەسى دە شەشىلىپ، ءبىراز لاۋازىمدى تۇلعا جۇمىستان بوساتىلعانىن، جاڭا سۋ كودەكسى كۇشىنە ەنسە، الدا دا شارالار قولعا الىناتىنىن مالىمدەدى.