ءانشى ءوزىنىڭ Instagram-ىن جۇرگىزبەي، جاڭالىقتارىمەن ءبولىسۋدى توقتاتقان. ۇتىستان جاپا شەككەن ادامدار بولماسا، بۇل جاعداي ارى قاراي دا جالعاسا بەرە مە ەدى. ەلدىڭ تۇكپىر-تۇكپىرىندەگى ادامدار ورىنداۋشىنىڭ اقشانى قايتارىپ بەرۋىن تالاپ ەتكەنى بەلگىلى.
قازىرگى ۋاقىتتا تەرگەۋ ءجۇرىپ جاتىر، الماتى قالاسى بويىنشا ەكونوميكالىق تەرگەۋ دەپارتامەنتى ەرناردىڭ ەكىنشى ۇيىنە اينالعانداي. ءارتىس زارداپ شەككەندەردى سابىرلىق تانىتىپ، سوت شەشىمىن كۇتۋگە شاقىردى.
– قۇرمەتتى لوتەرەيا ويىنىنا قاتىسىپ الدانىپ قالعان اعايىن.
مەن سىزدەردى جاقسى تۇسىنەمىن، سىزدەر ماعان سەنىپ لوتورەيا بيلەتىن ساتىپ الدىڭىزدار (ول ءۇشىن باسىمدى ءيىپ كەشىرىم سۇرايمىن)، ءدال سىزدەردەي مەن دە ويىن ۇيىمداستىرۋشىلارىنا سەنىپ الدانىپ وتىرمىن.
اللا ءبارىن كورىپ تۇر عوي، وسى ويىنعا قاتىستى مەندە تيتتەي دە بولسىن ارام وي بولعان ەمەس، سول سەبەپتى ماعان دا تۇسىنىستىكپەن قاراۋلارىڭىزدى ءوتىنىپ سۇرايمىن، – دەپتى.
ءانشى ءوز جازباسىندا ءقازىر الماتى قالاسى بويىنشا ەكونوميكالىق تەرگەۋ دەپارتامەنتىندە تەرگەۋ جۇمىستارى ءجۇرىپ جاتقانىن، ەشقايدا قاشىپعانىن، تەرگەۋدىڭ اياقتالۋىن كۇتىپ جۇرگەنىن ايتىپتى.
«قۇرمەتتى اعايىن، سىزدەر ساتىپ العان بيلەتتىڭ اقشاسىنا كەلەر بولساق، ول اقشانىڭ ءبىر تەڭگەسى دە مەندە ەمەس. مەن تەك جارناما جاسادىم: ول ءۇشىن قاتتى وكىنەمىن، سىزدەردەن شىن جۇرەگىممەن باسىمدى ءيىپ كەشىرىم سۇرايمىن
«جارناما ءۇشىن العان اقشاڭدى حالىققا بەرمەيسىڭ با؟ قايرىمدىلىققا كومەكتەسپەيسىڭبا؟ دەپ سۇراپ جاتقان اعايىنعا ايتارىم. ءدال وسى جارناما جاساپ، العان اقشامنىڭ اتىنان مەن وزدىگىمشە ەشتەڭە ىستەي المايمىن، بارلىعىن زاڭ شەشەدى. تەرگەۋ ءبىتىپ، سوت قالاي شەشىم قابىلدايدى سولاي بولادى. زاڭ جۇزىندە جارناما ءۇشىن العان اقشاڭدى قايتار دەسە قايتارۋعا دايىنمىن. زاڭ جۇزىندە جارناما ءۇشىن العان اقشا وزىڭدە قالادى دەپ شەشىم قابىلداسا، وندا اللا قالاسا، اللا رازىلىعى ءۇشىن مەن ول اقشانى قايرىمدىلىققا جۇمساۋعا دا دايىنمىن.
اق قاراسىن بىلمەي، ماعان قارعىس ايتىپ، جامان سوزدەر ايتىپ جاتقان اعايىن: «جۇيەلى قارعىس جۇيەسىن تابادى، جۇيەسىز قارعىس يەسىن تابادى». يا مەن ءسۇرىندىم. مۇمكىن سىزدەر ادامزاتتىڭ ەشقاشان سۇرىنبەيتىن تۇرىنەن شىعارسىزدار! مەندە ءوستىپ-وستىپ ءومىر ءسۇرۋدى ءبىر كۇندەرى ۇيرەنەرمىن. ۋاقىت تورەشى. مەن سىزدەرگە تەك قانا جاقسىلىق تىلەيمىن! تەرگەۋدىڭ اياقتالۋىن كۇتەيىك!»، – دەدى ەرنار ايدار.
