ءماجىلىس دەپۋتاتى ەرمۇرات باپي ەسكى قازاقستان، سونىڭ ىشىندە داريعا نازاربايەۆا تۋرالى مالىمدەمە جاسادى، - دەپ حابارلايدى Dalanews.kz.
ول دەپۋتاتتىق ساۋالىن ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆقا، اقپارات جانە مادەنيەت ءمينيسترى ايدا بالايەۆاعا جولدادى.
دەپۋتات باپي جۋىردا رەسپۋبليكالىق فەرمەرلەر فورۋمىنداعى پرەزيدەنت قاسىم-جومارت توقايەۆتىڭ ءسوزىن كەلتىردى: "بۇگىندە الەۋمەتتىك جەلىلەردە ادەمى ءومىر ءسۇرۋ مەن وڭاي ولجا تابۋ تۋرالى جارنامالار كوبەيىپ كەتتى. بۇل حالىقتىڭ ساناسىنا بارلىق جەتىستىككە قينالماي قول جەتكىزۋگە بولادى دەگەن بوس قيالدى سىڭىرەدى. جاستاردىڭ بەلگىلى ءبىر بولىگى سوعان سەنىپ، التىن ۋاقىتتارىن بوسقا سارپ ەتىپ جاتىر".
دەپۋتات پرەزيدەنتتىڭ ءدال وسى پىكىرى قوعامدا دا كورىنىس تاۋىپ جاتقانىن ايتىپ، نۇرسۇلتان نازاربايەۆتىڭ تۇڭعىشى داريعا تۋرالى دا ءسوز قوزعادى.
"جۋىقتا الەۋمەتتىك جەلىلەر ارقىلى پارلامەنت سەناتىنىڭ بۇرىنعى باسشىسى داريعا نازاربايەۆانى جەر-كوككە سىيعىزباي ماقتاعان ۆيدەو تاراعانى ءمالىم. البەتتە تاقىرىپقا جەلەۋ بولعان پەرسوناجدىڭ باسقالاردان ادامي "ارتىقشىلىعى" بولسا، وعان ەشقانداي داۋ جوق. ءبىراق بۇل ادام - داريعا حانىم كەشە عانا ەلدەگى ەكىنشى باسشىسى رەتىندە جوعارعى ساياسي لاۋازىم يەسى بولعانىن ۇمىتپاۋ كەرەك. سوندىقتان بۇنى بۇرىنعى ساياسي رەجيمنىڭ "ارتىقشىلىعىن" دارىپتەۋگە ارنالعان، قوعامدىق ساناعا سىڭىرىلمەك ساياسي مانيپۋلياسيا دەپ قابىلداۋ كەرەك"، - دەيدى ەرمۇرات باپي.
دەپۋتاتتىڭ پىكىرىنشە، "قازاق قوعامىنا ىرىتكى سالۋعا استىرتىن باعىتتالعان وسىنداي "ەسكىنى اڭساۋ" ءۇردىسى بۇگىندە ساياسي سيپات الا باستاعان". ەرمۇرات باپي الەۋمەتتىك جەلىلەر ارقىلى تاراپ جاتقان مۇنداي مانيپۋلياسيا ارقىلى "جاڭا قازاقستاندى "ساياسي جىك-جىككە ءبولۋ، ءوش الۋ، ەسە قايتارۋ"، "قايتىپ كەلۋ" ارەكەتىن بايقاۋ قيىن ەمەس.
ءماجىلىس دەپۋتاتى قاڭتار وقيعاسىنا قاتىستى دا ءسوز قوزعادى. ونىڭ سوزىنشە، بۇل قاندى وقيعاعا سەبەپ بولعاندار قوعامنىڭ ساناسىن تاعى دا ۋلاماق.
"قاڭتار وقيعاسىنا تىكەلەي قاتىسى بار، قانتوگىسكە سەبەپشى بولدى دەپ سانالاتىن "تەرىس ءدىني اعىم" يەلەرى ەندىگى جەردە قوعامنىڭ ساياسي ساناسىنا "قيقىم سالۋعا" بەلسەندى تۇردە كىرىسىپ جاتىر. بۇعان تاعى دا سول "ۋسپەشنىي ۋسپەح"-قا جەتكەن بۇرىنعىلار مۇرىندىق بولىپ وتىر. قاڭتاردىڭ قاھارىنان قاشىپ كەتكەندەر بىرتىندەپ، ەلگە ورالا باستادى"، - دەدى ول.
دەپۋتاتتىڭ ايتۋىنشا، "ەندى ولار ەل ىشىنە ۇلتتىق مۇرا مەن سالت-ساناعا قارسى يدەولوگيانى ءۇيىرىپ، ريەۆانشيستىك ساياساتتى قوعامعا سىڭىرۋگە قام جاساپ جاتىر".
"الەۋمەتتىك جەلىلەر مەن تارالىمى ميللونعا تاقاۋ جازىلۋشىسى بار تانىمال ينتەرنەت رەسۋرستارعا قارجىلاي كومەك بەرۋ ارقىلى، ولاردى ءوز "باۋىرلارىنا" باسىپ، اشىق پلاتفورمالار ارقىلى ساياسي تەڭسەلىستەر تۋدىرۋعا نيەتتى. ماعان مۇنداي ينسايدەرلىك اقپاراتتىڭ بىرنەشەۋى جەتتى"، - دەيدى باپي.
ونىڭ سوزىنشە، "بۇگىنگى بيلىك وتستاۆكاعا كەتەدى"، "مەرزىمىنەن بۇرىن وتەتىن سايلاۋلارعا سايلاۋعا دايىندىق ءجۇرىپ جاتىر"، "دەپۋتاتتاردان ۇيات كەتتى" دەگەن سياقتى ترەندتەردىڭ جەلىدە ەركىن تاراۋىنا سول ريەۆانشيستىك كۇشتەردىڭ ارەكەتتەرى سەبەپ بولىپ وتىر.
"بۇنىڭ ءبارى "بۇرىنعىنىڭ كەزىندە مۇنداي بولماعان" دەگەن تەزيستى تاراتۋ ارقىلى قوعامدىق ساناعا سولاقاي ساڭىلاۋ سالۋدىڭ ساياسات تەحنولوگياسى دەپ قابىلداۋ كەرەك.
مەن ءدال وسىنداي كونترپروپاگاندالىق ماتەريالداردىڭ ءبىر پوراسىن ءتيىستى ۆەدومستۆولاردىڭ جوعارى لاۋازىمگەرلەرىنە جولداعان ەدىم. ەندى قوعامعا ىرىتكى سالۋشى ءتۇپنۇسقالاردى انىقتاۋدى، ەڭ باستىسى – ەل-جۇرتقا جىك سالۋ پيعىلى بار وسىنداي "ەسكىشىل" استىرتىن كۇشتەردى انىقتاۋدى، ولار جونىندە قوعامعا تولىققاندى اقپارات بەرۋدى ۇلتتىق قاۋىپسىزدىك كوميتەتىنىڭ باسشىلىعىنان سۇرايمىن"، - دەدى دەپۋتات.
باپي بۇل تۇستا زاڭسىز قۋدالاۋ بولماۋى قاجەت ەكەنىن دە مالىمدەدى.
"جەمە-جەمگە كەلگەندە، "ەسكىشىلدىك" تەحنولوگياسى ۇلتتىق تۇتاستىققا قاستىق قىلاتىن، قازاق قوعامىن ساياسي لاگەرلەرگە بولشەكتەۋگە قۇشتار "ءسوز بوستاندىعى" ءبىزدىڭ ەلدىك بولاشاعىمىزعا قاتەر تۋدىرۋى ابدەن مۇمكىن. قازاقستاننىڭ قاۋىپسىزدىگىنە، جۋىق بولاشاقتاعى ەلدىك مۇراتىنا قاسكۇنەم مۇنداي ءسوز بوستاندىعى بىزگە قاجەت ەمەس دەپ سانايمىن. "بۇرىنعى بيلىكتى" اڭساۋشىلار ۋشىقتىرىپ، قازاقتار مەن جالپى مۇسىلماندار دۇنيەسىن "جاڭا قازاقستانعا" قارسى ايداپ سالىپ جۇرگەن ءدىني-ساياسي ارەكەتتەر دە اشكەرەلەنۋى كەرەك. قازاقتىڭ مىڭ جىلدىق ۇلتتىق مۇراتتارى مەن ۇلتتىق ءسالت-داستۇرى شاريعاتپەن ەمەس، ءتيىستى زاڭناما نورمالارىمەن رەتتەلۋى تيىستىگىن ۇمىتپايىق!" - دەدى ول.
