ەلىمىزدە ەنەرگەتيكا ءمينيسترى جاڭادان تاعايىندالدى. بۇل تۋرالى اقوردا جاريالاعان مەملەكەت باسشىسىنىڭ جارلىعىندا ايتىلادى، دەپ حابارلايدى Dalanews.kz.
"مەملەكەت باسشىسىنىڭ جارلىعىمەن ەرلان قۇدايبەرگەن ۇلى اقكەنجەنوۆ قازاقستان رەسپۋبليكاسىنىڭ ەنەرگەتيكا ءمينيسترى لاۋازىمىنا تاعايىندالدى"، دەلىنگەن جارلىقتا.
ال بۇعان دەيىنگى مينيستر الماسادام ساتقالييەۆ ەلىمىزدە جاڭادان قۇرىلعان اتوم ەنەرگياسى جونىندەگى اگەنتتىگىنىڭ ءتوراعاسى بولىپ تاعايىندالعان بولاتىن.
ايتا كەتسەك، مەملەكەت باسشىسى قاسىم-جومارت توقايەۆ 2025 جىلى 18 ناۋرىزدا "قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى" جارلىققا قول قويدى. وعان سايكەس قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى قۇرىلدى. ال 2024 جىلى 14 ناۋرىزدا بۋرابايدا وتكەن ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقايەۆ پرەزيدەنت جانىنداعى يادرولىق ەنەرگەتيكا اگەنتتىگىن قۇرۋ تۋرالى شەشىم قابىلداعانىن جاريالادى.
"ازاماتتارىمىز رەفەرەندۋمدا ءبىرىنشى اتوم ەلەكتر ستانساسىن سالۋ تۋرالى شەشىمگە قولداۋ كورسەتىپ، وسى مىندەتتى ورىنداۋعا جول اشىپ بەردى. بۇل قادام الىس بولاشاقتاعى احۋال قالاي بولاتىنىن ەسكەرە وتىرىپ، ەنەرگەتيكا سالاسىن كەشەندى تۇردە، جان-جاقتى ويلاستىرىپ دامىتۋ قاجەتتىگىن كورسەتەدى.ماسەلە ەلىمىزدىڭ ەنەرگياعا دەگەن قازىرگى سۇرانىسىن قاناعاتتاندىرۋعا عانا تىرەلىپ تۇرعان جوق. ءبىز ءۇشىن ەل ەكونوميكاسىنىڭ ونداعان جىل بويى قارقىندى دامۋىنا بەرىك نەگىز بولاتىن جاڭا ەنەرگەتيكا سالاسىن قالىپتاستىرۋدىڭ ستراتەگيالىق ماڭىزى بار. مەن، ءدال سول سەبەپتى، قازاقستانعا ءبىر ەمەس، ءۇش اتوم ەلەكتر ستانساسىن سالىپ، اقىرىندا تولىققاندى يادرولىق كلاستەر قالىپتاستىرۋ قاجەت دەپ ەسەپتەيمىن"، - دەگەن مەملەكەت باسشىسى وسى مىندەتتىڭ ايرىقشا ماڭىزدى ەكەنىن ەسكەرىپ، ءوزىنىڭ پرەزيدەنت جانىنداعى يادرولىق ەنەرگەتيكا اگەنتتىگىن قۇرۋ تۋرالى شەشىم قابىلداعانىن جەتكىزگەن ەدى.
بۇل رەتتە مەملەكەت باسشىسى بىزدەردىڭ گاز بەن كومىر ءوندىرۋ ىسىندەگى مۇمكىندىكتەرىمىزدى، سونداي-اق جاڭارتىلاتىن قۋات كوزدەرىنىڭ الەۋەتىن تولىق پايدالانۋىمىز كەرەك دەپ سانايدى.
