بۇگىن، 2025 جىلى 13 ناۋرىزدا مەملەكەت باسشىسى قاسىم-جومارت توقايەۆ حالىقارالىق سەرىكتەستىك جونىندەگى ەۋروپالىق كوميسسار يوزەف سيكەلانى قابىلدادى. پرەزيدەنت ەۋروپا وداعىنىڭ جوعارى مارتەبەلى وكىلىنە ءىلتيپات بىلدىرە وتىرىپ، ەلىمىز ماڭىزدى سىرتقى ەكونوميكالىق جانە ينۆەستيسيالىق سەرىكتەس رەتىندە ۇيىممەن جان-جاقتى ستراتەگيالىق ىنتىماقتاستىققا باسىمدىق بەرەتىنىن ايتتى، دەپ حابارلايدى Dalanews.kz اقوردانىڭ باسپا ءسوز قىزمەتىنە سىلتەمە جاساي وتىرىپ.
"قازاقستان ەۋروپا وداعىنىڭ ورتالىق ازياداعى نەگىزگى ارىپتەسى بولىپ قالا بەرەدى. Cەرىكتەستىكتى كەڭەيتۋ جانە ىنتىماقتاستىق تۋرالى كەلىسىم ءبىزدىڭ كوپجوسپارلى ءوزارا ىقپالداستىعىمىزدى تەرەڭدەتۋدىڭ بەرىك نەگىزىن قالايدى"، – دەدى مەملەكەت باسشىسى.
يوزەف سيكەلا ەۋروپا وداعى ايماققا ايرىقشا نازار اۋدارىپ وتىرعانىن اتاپ ءوتتى.
"حالىقارالىق سەرىكتەستىك جونىندەگى كوميسسار رەتىندە العاشقى ساپارىما باسا ءمان بەرەمىن. ورتالىق ازيانىڭ بەس ەلىنە كەلۋ جونىندە شەشىم قابىلداۋىم بەكەر ەمەس. بۇل – ەۋروپا وداعىنىڭ قازاقستانمەن جانە ايماقتىڭ باسقا مەملەكەتتەرىمەن اناعۇرلىم تەرەڭ ءارى ورنىقتى بايلانىس ورناتۋعا نيەتتى ەكەنىن ايقىن كورسەتەدى"، – دەدى ەۋروكوميسسار.
قاسىم-جومارت توقايەۆ پەن يوزەف سيكەلا كولىك دالىزدەرىن، لوگيستيكالىق ينفراقۇرىلىمدى، ورنىقتى ەنەرگەتيكا مەن سيفرلىق شەشىمدەردى دامىتۋ بويىنشا قازىرگى ۋاقىتتا جۇزەگە اسىرىلىپ جاتقان جانە جاڭا ەكونوميكالىق جوبالارعا دەن قويا وتىرىپ، ەكىجاقتى كۇن ءتارتىبىنىڭ ناقتى ماسەلەلەرىن تالقىلادى.
بۇعان دەيىن مەملەكەت باسشىسى PresightAI كومپانياسىنىڭ باسقارما ءتوراعاسى توماس پراموتەدحامدى قابىلداعانىن، كەزدەسۋ بارىسىندا قازاقستاندا ونىمدىلىگى جوعارى ەسەپتەۋ، سيفرلىق ترانسفورماسيا جانە وزىق تەحنولوگيالاردى ەنگىزۋ باعىتىنداعى ىنتىماقتاستىقتى ودان ءارى نىعايتۋ ماسەلەلەرى قاراستىرىلعانىن جازعانبىز.
