ەڭبەك مينيسترلىگى كورەيادا زاڭسىز جۇرگەن قازاقستاندىقتارعا ەلگە ورالۋعا كەڭەس بەردى، دەپ حابارلايدى Dalanews.kz.
قازاقستاننىڭ ەڭبەك جانە حالىقتى الەۋمەتتىك قورعاۋ ءمينيسترىنىڭ ءبىرىنشى ورىنباسارى اسقاربەك ەرتايەۆتىڭ ايتۋىنشا، بۇگىندە وڭتۇستىك كورەيادا شامامەن 15 مىڭ قازاقستاندىق جۇمىس ىستەيدى. ولاردىڭ ىشىندە 11 مىڭىنىڭ مارتەبەسى زاڭسىز.
ەكى ەل اراسىنداعى كەلىسىم ءالى رەتتەلمەگەن
ەرتايەۆتىڭ مالىمەتىنشە، قازاقستاندىقتار كورەيادا رەسمي تۇردە ەڭبەك ەتە الماي وتىر، سەبەبى ەكى ەل اراسىنداعى جۇمىس كۇشىن زاڭدى جولمەن تارتۋ جونىندەگى كەلىسىمدەر ءالى جاسالماعان.
كورەيادا جاپپاي تەكسەرىس باستالدى
جاقىندا وڭتۇستىك كورەيا پوليسياسى زاڭسىز ميگرانتتارعا قارسى ءىرى رەيد جۇرگىزىپ، ەلدە رۇقساتسىز جۇرگەن شەتەل ازاماتتارىن ۇستاپ، ءوز ەلدەرىنە قايتاردى.
بيلىك جىل سوڭىنا دەيىن زاڭسىز جۇرگەندەردىڭ بارلىعى ەرىكتى تۇردە ەلىنە ورالۋى قاجەت ەكەنىن ەسكەرتكەن.
مينيسترلىك كورەيادا جۇرگەن قازاقستاندىقتارعا ەلگە ءوز ەركىمەن قايتىپ، زاڭدى جۇمىس ىستەۋ جولدارىن قاراستىرۋعا كەڭەس بەردى.
