ەلوردانى ەلباسىنىڭ ەسىمىمەن اتاۋدى ۇسىنعان دەپۋتاتتار تاعى دا توبە كورسەتتى

Dalanews 03 ناۋ. 2017 12:56 357

ءبىزدىڭ دەپۋتاتتارعا داۋا جوق ەكەن. ايتقان ءسوزدى تۇسىنبەيتىن مۇنداي دا ادامدار بولادى كىم ويلاعان. حالىق قالاۋلىلارى باياعى ادەتتەرىنە باسىپ، استانانى تۇڭعىش پەرزيدەنتىمىز نۇرسۇلتان نازاربايەۆتىڭ اتىمەن اتايىق دەپ تاعى دا بۇيرەكتەن-سيراق شىعاردى.

بۇل جولى كونستيتۋسياعا ەنگىزىلەتىن وزگەرىستەر تالقىلاعان قوس پالاتانىڭ بىرلەسكەن سەنات دەپۋتاتتى دارحان قالەتايەۆ: «2008 جىلى مەن استانا حالىقارالىق اۋەجايىن تۇڭعىش پرەزيدەنت، كوشباسشى نۇرسۇلتان نازاربايەۆتىڭ ەسىمىمەن اتاۋدى ۇسىنعان بولاتىنمىن. بۇل باستاما قوعامدا كەڭىنەن تالقىلاندى. مەنىڭ ويىمشا، ۇلكەن قولداۋعا يە بولدى»، – دەدى. بۇدان كەيىن وزگە دەپۋتاتتار قالسىن با، ءوز كەزەگىندە پاۆەل كازانسيەۆ تە ارىپتەسىنىڭ ۇسىنسىن قولداپ؛

– مەن بايىرعى اقمولا تۇرعىنى رەتىندە بۇل ۇسىنىس ءبىزدىڭ تاماشا استانامىزدى عانا ەمەس، تاۋەلسىز قازاقستان مەملەكەتىن قۇرعان تۇلعاعا كورسەتىلەتىن قۇرمەت رەتىندە ادىلەتتى دەپ ويلايمىن، – دەپ ابدەن تىزەسى شىققان اڭگىمەنى تاعى شيىرلادى.

جالپى، بۇعان دەيىندە ەلوردانى ەلباسىنىڭ ەسىمىمەن اتاۋ تۋراسىندا تالاي دەپۋتاتتار ۇسىنىس تاستاعانى ەسىمىزدە. نازاربايەۆ سوڭعى رەت «روسسيا 24» تەلەارناسىنا بەرگەن سۇحباتىندا «استانا –  بۇل برەند. استانانىڭ اتاۋىن وزگەرتۋدىڭ ەش قاجەتى جوق»، – دەپ تۇسىنىكتى تىلمەن ايتقان ەدى. ءبىراق ءبىزدىڭ ۇمىتشاق دەپۋتاتتار مۇنى ەستەن شىعارعان كەتكەن سىڭايلى.

تاۋەلسىز قازاقستاندى قۇرۋدا ەلباسىنىڭ ەڭبەگىن ەشكىم جوققا شىعارمايدى. حالىقتىڭ ءوزى پرەزيدەنتىمىزگە «ەلباسى» دەپ لايىقتى باعاسى بەرگەنى بەلگىلى. بالەنىڭ ءبارىن بىلەتىن دەپۋتاتتار مۇنى بىلىمەيدى دەگەنگە ءتىپتى سەنگىڭ كەلمەيدى. ەندى ۇمىتشاق دەپۋتاتتارعا جەكە-جەكە بۇل ماسەلەنى قايتادان ءتۇسىندىرىپ شىعۋدان باسقا امال قالماي تۇر.

ن.اۋباكىر

ۇسىنىلعان
سوڭعى جاڭالىقتار