استانادا «ەلوردا جاستارى» تۇرعىن ءۇي باعدارلاماسى ىسكە اسىرىلىپ جاتىر، وعان «جۇمىس ىستەيتىن جاستارعا ساتىپ الۋ قۇقىعىنسىز جالعا بەرىلەتىن تۇرعىن ءۇي» باعدارلاماسى بويىنشا كەلىسىمشارتى 2025 جىلدىڭ باسىندا اياقتالاتىن جاستار قاتىسا الادى، - دەپ حابارلايدى Dalanews.kz استانا اكىمدىگىنىڭ رەسمي سايتىنا سىلتەمە جاساپ.
17 اقپاننان باستاپ «وتباسى بانكىندە» «ەلوردا جاستارى» تۇرعىن ءۇي باعدارلاماسى اياسىندا وسى ازاماتتاردى ودان ءارى كرەديتتەۋگە تولەم قابىلەتتىلىگىن راستاۋ ءراسىمى باستالدى.
تولەم قابىلەتتىلىگىن تەكسەرۋگە جولدامالاردى تۇرعىن ءۇي ورتالىعى ەلەكتروندىق جانە قاعاز فورماتتا ۇسىنادى. ەلەكتروندىق نۇسقالار قاتىسۋشىلارعا WhatsApp ارقىلى كورسەتىلگەن تەلەفون نومىرلەرىنە جىبەرىلەدى.
بىلىكتىلىك الۋ ءۇشىن قاجەتتى قۇجات بەرىلگەن ساتتەن باستاپ 30 كۇنتىزبەلىك كۇن ىشىندە جارامدى بولادى.
جولداماسى بار جاستارعا كۆاليفيكاسيا الۋ ءۇشىن مىنا مەكەنجايلار بويىنشا بانك فيليالدارىنا جۇگىنۋ قاجەت:
- ر.قوشقاربايەۆ داڭعىلى، 26؛
- قاجىمۇقان كوشەسى، 12ا؛
- ماڭگىلىك ەل داڭعىلى، 27؛
- بەيبىتشىلىك كوشەسى، 25.
ەستەرىڭىزگە سالا كەتەيىك، «ەلوردا جاستارى» باعدارلاماسى جاستارعا جىلدىق 5 پايىزدىق مولشەرلەمەمەن جەڭىلدەتىلگەن تۇرعىن ءۇي نەسيەسىن ۇسىنادى.
قارىزدىڭ ەڭ جوعارى سوماسى 18 ميلليون تەڭگەنى قۇرايدى، بۇل رەتتە جيناقتاۋ مەرزىمىنە قاراماستان، تۇرعىن ءۇيدىڭ نارىقتىق قۇنىنىڭ 10 پايىز مولشەرىندە باستاپقى جارنا قاجەت.
نەسيەلەۋ مەرزىمى 19 جىلعا دەيىن جەتۋى مۇمكىن. باعدارلاماعا قاتىسۋشىلاردىڭ باستاپقى جانە قايتالاما نارىقتا ءوز تۇرعىن ۇيلەرىن ساتىپ الۋ مۇمكىندىگى بار.
