قالا اكىمىنىڭ ورىنباسارى باقتيار ماكەن بالاقايلاردى كەلە جاتقان جاڭا جىل مەيرامىمەن قۇتتىقتاپ، سىي-سياپاتتاردى تابىس ەتتى.
– بارشاڭىزدى كەلە جاتقان جاڭا جىل مەرەكەسىمەن شىن جۇرەكتەن قۇتتىقتايمىن! سىزدەرگە باقىتتى بالالىق شاق، جاقسىلىق اتاۋلىنىڭ ءبارىن تىلەيمىن! جۇزدەرىڭىزدەن كۇلكى كەتپەسىن! ەلىمىزدىڭ ەرتەڭگى كۇنى سىزدەردىڭ قولدارىڭىزدا. قازىرگى تاڭدا نۇر-سۇلتاندا ارنايى «قايىرىمدى قالا» دەگەن ۇلكەن اكسيا باستادىق. سونىڭ اياسىندا كىشكەنتاي بۇلدىرشىندەرىمىزدى شاقىرىپ، مەرەكەلىك كوڭىل-كۇي سىيلاعىمىز كەلدى. ازداعان سىي-سياپاتتارىمىز بار. مەكتەپتە ساباقتارىڭىزدى جاقسى وقىپ، ەرتەڭگى ەلىمىزدىڭ ءبىلىمدى ازاماتى بولۋلارىڭىزعا تىلەكشىمىن، – دەدى ول.
سونداي-اق، اكىم ورىنباسارى ءسوز اراسىندا وقۋشىلارعا ءبىلىم ءنارىن بەرىپ جۇرگەن ۇستازدار قاۋىمىنا ەرەكشە العىس ءبىلدىرىپ ءوتتى.
«وسىعان دەيىن «قايىرىمدى قالا» اكسياسى اياسىندا الەۋمەتتىك از قامتىلعان وتباسىدان شىققان بۇلدىرشىندەرگە دەلفيندەر شوۋىن ۇيىمداستىرعان بولاتىنبىز. سول سياقتى ءتۇرلى ءىس-شارالار ءوتتى. بۇگىن مىنە قالامىزداعى كورىكتى ورىنداردىڭ بىرىندە شىرشا تويىن وزدەرىڭىزبەن وتكىزىپ وتىرمىز. مەملەكەت باسشىسى وسكەلەڭ ۇرپاقتىڭ ءبىلىمدى ازامات بولىپ ءوسۋى ءۇشىن قولايلى جاعداي جاساپ وتىر. ءبىز سىزدەرگە سەنىم ارتامىز»، – دەپ ب. ماكەن جىلى لەبىزىن ءبىلدىردى.
«نۇر-سۇلتان قالاسىنىڭ اكىمدىگى الەۋمەتتىك از قامتىلعان، كوپبالالى وتباسىلاردان شىققان بالالارعا، مۇمكىندىگى شەكتەۋلى بۇلدىرشىندەرگە قايىرىمدىلىق ايلىعىن وتكىزىپ كەلەدى.
مىنە وسىنىڭ اياسىندا جاڭا جىل مەرەكەسىنىڭ قارساڭىندا Mega Silk Way ءوزىنىڭ Happylon اۋماعىندا شىرشا تويىن ۇيىمداستىرىپ وتىر. ال بۇلدىرشىندەرگە سىيلىقتاردى «نۇرلى استانا» كورپوراتيۆتىك قورى جەتكىزدى.
سىيلىقتاردىڭ اراسىندا گەرمانيادا وندىرىلگەن جاڭاجىلدىق تاتتىلەر دە بار. بۇگىنگى مەرەكەلىك جيىنعا قالامىزدىڭ 10-نان استام مەكتەبىنەن جوعارىدا ايتىلعان ساناتتاعى 150-گە تارتا بالا كەلدى»، - دەدى ەلوردا اكىمدىگى اپپاراتىنىڭ باس مامانى ساۋلە بەيسەمبايەۆا. شىرشا تويى بارىسىندا بالالارعا Happylon ىشىندەگى كوڭىل كوتەرەرلىك اتتراكسيوننىڭ ءبارى ءبىر ساعات ىشىندە تەگىن بولدى.
