بۇرىنعى دەنساۋلىق ساقتاۋ ءمينيسترى ەلجان ءبىرتانوۆ ولجاس ءابىش ەكەۋىنە قاتىستى ءىس بويىنشا جاڭا دەرەكتەردى ءبولىستى، دەپ حابارلايدى Dalanews.kz.
ءبىرتانوۆ نە دەيدى؟
ەكس-شەنەۋنىكتىڭ سوزىنشە، 28 مامىردا ارىپتەسى ولجاس ءابىش باس پروكۋراتۋراعا ءوتىنىش جازعان.
"ولجاس سيفرلاندىرۋ سالاسىنداعى بەلگىلى مامان بولعاننان كەيىن مەملەكەتتىك سايتتاردان، دەنساۋلىق ساقتاۋ مينيسترلىگىنىڭ سايتىنان ءبىراز زەرتتەۋ جاساپ، بىرنەشە ماڭىزدى، قىزىق قۇجاتتار تاۋىپ، سولاردىڭ نەگىزىندە ءوتىنىشىن جازىپ جىبەردى. تىكەلەي ايتساق، بۇل قۇجاتتاردا ءبىزدىڭ ءىس بويىنشا ماڭىزدى اقپارات بار. سوت بولىپ جاتقان كەزدە دەنساۋلىق ساقتاۋ مينيسترلىگىنىڭ كەيبىر ماماندارى، باس مامان بەيبىت ەسەنبايەۆ مىرزا باسقا كومپانيالارعا، سيفرلىق IT كومپانيالارعا سيفرلىق پلاتفورمامەن جۇمىس ىستەۋ بويىنشا تاپسىرما بەرگەن. "پلاتفورماعا اقپارات جىبەرۋ كەرەك" دەگەن. تەحنيكالىق مامان ەمەسپىن. ولجاس تەحنيكالىق مامان بولعاننان كەيىن "پلاتفورما جۇمىس ىستەمەسە، وعان قالاي اقپارات جىبەرەدى؟" دەيدى. ...ونىڭ سوتتا بىزگە قارسى بەرگەن ايعاقتارى سايكەس كەلمەيدى"، - دەدى ول "قاسقا جولعا" بەرگەن سۇحباتىندا.
ەلجان ءبىرتانوۆ باس پروكۋراتۋرادان نە سۇراپ وتىرعاندارىن ايتتى.
"كولىك جۇرگىزۋ كۋالىگىن الۋ ءۇشىن انىقتاما كەرەك. ول انىقتاما 2019 جىلى ەلەكترون تۇردە دايىن تۇردى، ينتەگراسيا جاسالىپ قويعان. ءقازىر دە تۇر. ناركولوگيالىق ورتالىقتىڭ انىقتامالارى دا پلاتفورما ارقىلى دەپ جازىلىپ تۇر. ءقازىر دە تۇر. "ەلەكترون تۇردە اشتىق" دەپ جاتىر. التى جىل بۇرىن شەشىلگەن ماسەلە. وسىنداي دەرەكتەردى تەكسەرۋدى سۇراپ وتىرمىز"، - دەدى ول.
بۇرىنعى شەنەۋنىك وتىنىشتەرى ازىرگە قارالماعانىن جەتكىزدى.
"ازىرگە جاۋاپ كەلمەدى. زاڭ بويىنشا وتىز كۇندە جاۋاپ بەرۋى كەرەك. بۇرىن دا كوپ شاعىم جازعانبىز. كوپ جاعدايدا ۋاقىتىندا قارالمايدى. سودان قورىققاننان كەيىن ولجاس الەۋمەتتىك جەلىلەرگە شىعىپ، پىكىرىن ايتىپ جاتىر. ادىلدىك بولسىن دەپ شىعارىپ وتىرمىز"، - دەدى ول.
ءبىرتانوۆ قازىرگى احۋالعا، مينيسترگە قاتىستى پىكىر ءبىلدىردى.
"جوعارى لاۋازىمدى ازاماتتار بيلىك بار، اقشا بار بەس جىل ىشىندە تەحنيكالىق ماسەلەنى شەشە الماي جۇرگەنى باسىما كىرمەيدى، تۇسىنبەيمىن. پرەزيدەنت جىل سايىن جولداۋىندا "دەنساۋلىق ساقتاۋ سالاسىندا سيفرلاندىرۋ وتە ماڭىزدى، ءبارىن تەزىرەك ءبىتىرۋ كەرەك" دەپ ايتىپ كەلەدى. ءبىراق ورىندالماي جاتىر. كەيىنگى جىلدارى جولداۋىنا كىرگىزبەيدى. ءبىراق ماسەلە قالدى عوي. بىلتىر جاڭا مينيستر كەلدى، ول تىرىسىپ جاتىر، كورىپ وتىرمىز. ءبىراز تىرلىك باستالدى. وعان دا ۋاقىت كەرەك. "2025 جىلدىڭ اياعىنا دەيىن بىتىرەمىز" دەپ وتىر. ءالنازاروۆا وتە جاۋاپتى، تاجىريبەسى مول كىسى عوي، ءبىراق ورىنداۋشىلارى ەسەنبايەۆ سەكىلدى ادامدار ءالى وتىر. ولار سول كەزدە ەشتەڭە بىتىرمەدى، بىزگە جالا جاپتى، وزدەرىنىڭ قانداي مۇددەسى بار، كىم بىلەدى؟!" - دەدى ەكس-شەنەۋنىك.
بۇعان دەيىنگى جاعداي
جۋىردا بۇرىنعى دەنساۋلىق ساقتاۋ ءمينيسترى ەلجان ءبىرتانوۆ پەن ونىڭ ورىنباسارى بولعان ولجاس ءابىشتىڭ اتىشۋلى ءىسى قايتا قارالۋى مۇمكىن ەكەنى حابارلاندى. بۇل تۋرالى ولجاس ءابىش Facebook پاراقشاسىندا حابارلاپ، جاڭا قۇجاتتار پايدا بولعانىن مالىمدەدى.
ونىڭ سوزىنشە، 2022 جىلى سوتتىڭ ەكەۋىنە شىعارعان ايىپتاۋ ۇكىمى نەگىزىنەن جالعىز كۋاگەردىڭ بەرگەن تۇسىنىكتەمەسىنە سۇيەنگەن. ەندى سوعان مۇلدەم كەرەعار كەلەتىن رەسمي دەرەكتەر قولدارىنا تيگەن كورىنەدى. وسىعان بايلانىستى ولجاس ءابىش پەن قورعاۋشىلارى باس پروكۋراتۋراعا رەسمي ارىز تۇسىرگەن.
ءبىرتانوۆ پەن ابىشكە قاتىستى ءىس
2022 جىلى قازاندا ەلجان ءبىرتانوۆ پەن ولجاس ءابىش 2018 جىلى حورۆاتيالىق Ericsson كومپانياسىمەن اراداعى قۇنى 1،3 ملرد تەڭگەلىك سيفرلىق پلاتفورمانى "ىستەمەسە دە قابىلداپ الدى" دەگەن ايىپپەن كىنالى دەپ تانىلعان ەدى. سوت شەشىمىمەن ءبىرتانوۆ بەس جىلعا، ال ءابىش ءتورت جىلعا باس بوستاندىعىنان شەكتەلگەن بولاتىن. سونداي-اق، ەكەۋى مەملەكەتكە كەلتىرگەن شىعىندى بىرگە وتەۋگە مىندەتتەلدى.
