ەلىمىزدە ءقازاقتىلدى مۋلتفيلم جاساۋعا 350 ميلليون بولىنەدى، - دەپ حابارلايدى Dalanews.kz. 

بۇل تۋرالى ءماجىلىس دەپۋتاتى اسحات ايماعامبەتوۆ ايتتى. دەپۋتات قازاق تىلىندەگى مۋلتفيلمدەر وتە از، ال YouTube سياقتى قولجەتىمدى پلاتفورمالاردا مۇلدە جوقتىڭ قاسى ەكەنىن اتاپ ءوتتى.

"بۇگىنگى كۇنى بۇل ۇلكەن ماسەلە، ويتكەنى بالالار تەلەديداردان گورى ينتەرنەت پەن YouTube-تى كوبىرەك تاڭدايدى. بالالار “سينيي تراكتور” مەن “ماشا ي مەدۆەد” سياقتى مۋلتفيلمدەرمەن شەكتەلمەي، ساپالى ءارى قىزىقتى قازاقشا مۋلتفيلمدەردى كورۋى ءتيىس. وسى ماقساتتا، كەلەسى جىلدىڭ بيۋدجەت جوباسىن قاراستىرۋ بارىسىندا، قازاق تىلىندەگى مۋلتفيلمدەر جاساۋعا 350 ميلليون تەڭگە ءبولۋدى جانە ولاردىڭ تەك تەلەديدارعا ەمەس، مىندەتتى تۇردە ينتەرنەتكە، سونىڭ ىشىندە YouTube-قا جۇكتەلۋىن قامتاماسىز ەتەتىن نورمانى زاڭعا ەنگىزدىك. بۇل بالالاردىڭ قازاق تىلىندە قىزىقتى كونتەنتكە قول جەتكىزۋ مۇمكىندىگىن كەڭەيتەدى دەپ سەنەمىز"، - دەپ جازدى دەپۋتات.

اسحات ايماعامبەتوۆتىڭ سوزىنشە، قازاقشا بالالار كونتەنتىن جاساۋدا بەلگىلى ءبىر قيىندىقتار.

"ماسەلەن، "بالاپان" تەلەارناسىنىڭ كونتەنت جاساۋشىلارعا تولەيتىن قاراجاتى وتە از بولعاندىقتان، ولار تەك قازاق ءتىلىن قولداۋ ماقساتىندا جۇمىس ىستەپ، كوبىنە ۆولونتەر سياقتى ارەكەت ەتەدى. سوندىقتان، وسى بيۋدجەت ارقىلى بولىنگەن قوسىمشا قاراجات قازاقشا كونتەنتتىڭ ساپاسىن ارتتىرۋعا ىقپال ەتەدى دەپ سەنەمىز. جالپى، بالالار اراسىندا قازاقشا كونتەنتتى تۇتىنۋ بويىنشا ساپالى عىلىمي زەرتتەۋ جۇرگىزۋ قاجەت. وسىعان بايلانىستى عىلىم مينيسترلىگىنە ءتيىستى ۇسىنىس جاسادىق"، - دەيدى ول. 

سونىمەن قاتار، ايماعامبەتوۆ الەمدىك حيت مۋلتفيلمدەردى دە مەملەكەتتىك تىلگە اۋدارىپ، YouTube-قا جۇكتەۋ ماڭىزدى ەكەنىن اتاپ وتكەن.

"بۇل ءۇشىن اۆتورلىق قۇقىق يەلەرىمەن اۋقىمدى جۇمىس قاجەت. ازىرگە بۇل ماسەلە تولىق شەشىلگەن جوق، ءبىراق الداعى ۋاقىتتا وسى باعىتتا جۇمىستى جالعاستىرۋدى جوسپارلاپ وتىرمىز"، - دەيدى دەپۋتات.