بوكستان توكيو وليمپياداسىنىڭ قولا جۇلدەگەرى ساكەن بيبوسىنوۆ جەكە مانسابىنا بايلانىستى الەۋمەتتىك جەلىدە تاراپ جاتقان اقپاراتتاردى جوققا شىعاردى، دەپ حابارلادى Dalanews.kz.
جاقىندا الەۋمەتتىك جەلىدە بيبوسىنوۆتىڭ ۇلتتىق قۇراما كوماندانىڭ بۇرىنعى باس جاتتىقتىرۋشىسى مىرزاعالي ايتجانوۆتىڭ سوڭىنان كەتەتىنى تۋرالى اقپارات تاراعان ەدى.
سپورتشى بۇل اقپارات شىندىققا جاناسپايتىنىن جەتكىزدى.
"اللا ساقتاسىن، ەلىمىزدە نەشە ءتۇرلى ادامدار بار. اۋديتوريا جيناۋ ءۇشىن نە ىستەمەيدى؟! مىناۋ ءسوز – جالعان اقپارات. مەن بوكستى قويعان جوقپىن"، - دەدى ول Instagram-پاراقشاسىندا.
ايتا كەتەيىك، مىرزاعالي ايتجانوۆ – بيبوسىنوۆتىڭ جەكە جاتتىقتىرۋشىسى.
ەسكە سالايىق، بىرنەشە كۇن بۇرىن بوكستان قازاقستان ەرلەر قۇراماسىنىڭ باس جاتتىقتىرۋشىسى مىرزاعالي ايتجانوۆ پەن وزگە دە ماماندار قىزمەتىنەن بوساتىلعان ەدى. بۇعان پاريج وليمپياداسىنداعى ساتسىزدىكتەر سەبەپ بولدى.
بۇل تۋرالى قازاقستان بوكس فەدەراسياسى حابارلادى.
قازاقستان بوكس فەدەراسياسىنىڭ شەشىمى ق ر دەنە شىنىقتىرۋ جانە سپورت ىستەرى بويىنشا كوميتەتىمەن ماقۇلدانعان.
قازاقستان بوكسىندا كادرلىق وزگەرىستەر ورىن الدى. پاريج وليمپياداسىنىڭ قورىتىندىسى بويىنشا كەڭەس وتكىزىلىپ، ەرلەر قۇراماسىنىڭ باپكەرلىك قۇرامى تولىعىمەن جۇمىستان شەتتەتىلدى. وسىلايشا كەلەسى وزگەرىستەر جايىندا حابارلايمىز:
"باس جاتتىقتىرۋشى مىرزاعالي ايتجانوۆ جانە باپكەرلىك قۇرامداعى 10 مامان، قبف ۆيسە-پرەزيدەنتى ازيز قوجامبەتوۆ قىزمەتتەن بوساتىلدى. قازاقستاننىڭ ەڭبەك سىڭىرگەن جاتتىقتىرۋشىسى تۇرسىنعالي ەدىلوۆ قازاقستان بوكس فەدەراسياسى پرەزيدەنتىنىڭ كەڭەسشىسى قىزمەتىنە تاعايىندالدى"، - دەپ جازىلدى رەسمي حابارلامادا.
ءقازىر ايتجانوۆتىڭ ورنىنا بوكس فەدەراسياسى تۋريزم جانە سپورت مينيسترلىگىمەن كەلىسە وتىرىپ، قايرات ساتجانوۆتى ۇلتتىق قۇراما كوماندانىڭ باس جاتتىقتىرۋشىسى ەتىپ تاعايىندادى.
ال ساكەن بيبوسىنوۆ شيرەك فينالدا وزبەك بوكسشىسى حاسانبوي دۋسماتوۆتان جەڭىلدى.
