كەشە جاستار ساياساتى كەڭەسىنىڭ وتىرىسى ءوتتى. باسقوسۋدا 2026–2028 جىلدارعا ارنالعان ناشاقورلىق پەن ەسىرتكى بيزنەسىنە قارسى كۇرەس جونىندەگى كەشەندى جوسپار جوباسى تالقىلاندى، دەپ حابارلايدى Dalanews.kz.
كەڭەس مۇشەسى ءارى «دالا قىراندارى» قوزعالىسىنىڭ كوورديناتورى مەيىربولات تويتوۆ جاستار اراسىنداعى ەسىرتكىگە قارسى كۇرەستى كۇشەيتۋ جونىندە ءبىرقاتار ناقتى ۇسىنىستارىن ايتتى. ونىڭ ىشىندە جاستاردى سالاۋاتتى ءومىر سالتىنا باۋلۋ، ەسىرتكىگە قارسى اقپاراتتىق-اعارتۋ شارالارىن كەڭەيتۋ جانە ينتەرنەت ارقىلى تاراتىلاتىن ەسىرتكى جارناماسىنا توسقاۋىل قويۋ ماسەلەلەرى كوتەرىلدى.
جاستار ساياساتى كەڭەسى وكىلدەرىنىڭ ايتۋىنشا، قابىلداناتىن كەشەندى جوسپار جاستاردىڭ بوس ۋاقىتىن ءتيىمدى وتكىزۋگە جاعداي جاساۋ، سپورتتىق جانە مادەني جوبالاردى دامىتۋ ارقىلى ناشاقورلىقتىڭ الدىن الۋ باعىتىنداعى جۇمىستاردى جۇيەلەۋگە مۇمكىندىك بەرەدى.
«دالا قىراندارى» قوزعالىسى جاستار اراسىندا سالاۋاتتى ءومىر سالتىن ناسيحاتتاۋ جانە ەسىرتكىگە قارسى قوعامدىق يممۋنيتەت قالىپتاستىرۋ باعىتىنداعى جۇمىستارىن جالعاستىرادى.
