– بيىل پارتيا بىرنەشە ماڭىزدى ساياسي ناۋقان وتكىزدى. ەڭ باستىسى بىزدەر پارلامەنت ءماجىلىسىنىڭ سايلاۋىنا قاتىسىپ، جەڭىسكە جەتتىك. سونداي-اق، تاريحىمىزدا العاش رەت اۋىل اكىمدەرىنىڭ سايلاۋى ءوتتى. پارتيانىڭ ورتالىق اپپاراتى مەن فيليالدارى جەرگىلىكتى جەرلەردە اۋقىمدى جۇمىس اتقاردى. قاراشا ايىندا پارتيانىڭ ساياسي كەڭەسىنىڭ كەڭەيتىلگەن وتىرىسىن وتكىزۋ جوسپارلانىپ وتىر. وندا وتكەن ناۋقانداردىڭ قورىتىندىسى بويىنشا كوزگە تۇسكەن پارتيا بەلسەندىلەرىنىڭ ەڭبەگىن اتاپ ءوتۋىمىز كەرەك، – دەدى ەلباسى.
«Nur Otan» پارتياسىنىڭ ءتوراعاسى حالىقپەن تىعىز بايلانىستا جۇمىس ىستەۋدى جالعاستىرۋ كەرەكتىگىن ايتىپ، سايلاۋالدى ۋادەلەردىڭ جۇزەگە اسۋىن قاداعالاۋدىڭ ماڭىزدىلىعىنا توقتالدى.
– جۇرتشىلىقپەن جۇمىستى جالعاستىرعان ءجون. ولاردىڭ ماسەلەلەرىن ءبىلۋ، اتقارۋشى بيلىك ورگاندارىنا جەتكىزۋ جانە شەشىمىن تابۋىن قاداعالاۋ قاجەت. پارتيا بەدەلىن نىعايتۋدى ءارى قاراي جالعاستىرۋ كەرەك، – دەدى نۇرسۇلتان نازاربايەۆ.
باۋىرجان بايبەك اۋىل اكىمدەرىن سايلاۋ ناتيجەلەرىن باياندادى، سونداي-اق «Nur Otan» مۇشەلەرى مەن ەلەكتوراتتىڭ بۇل پروسەسكە بەلسەنە اتسالىسقانىن اتاپ ءوتتى.
– اۋىل اكىمدەرىن تىكەلەي سايلاۋدىڭ قورىتىندىسى بويىنشا ءبىزدىڭ پارتيانىڭ وكىلدەرى وكرۋگتەردىڭ 86 پايىزىندا جەڭىسكە جەتتى. پارتيا ارقىلى سايلانعانداردىڭ 35 پايىزى جاڭادان كەلگەندەر. جالپى اكىمدەر كورپۋسى 50 پايىزعا جاڭاردى. ولاردىڭ ورتاشا جاسى – 46، ايەلدەر – 11 پايىزدى، جاستار – 14 پايىزدى قۇرادى، – دەدى «Nur Otan» پارتياسى ءتوراعاسىنىڭ ءبىرىنشى ورىنباسارى.
باۋىرجان بايبەكتىڭ مالىمەتى بويىنشا جىل باسىنان بەرى پارتيانىڭ قوعامدىق قابىلداۋلارىنا 103 مىڭنان استام ادام حابارلاسىپ، 20 مىڭ ازامات قابىلداندى. سونداي-اق وڭىرلەردە قوعامدىق كەڭەستەر ارقىلى تۇسكەن 4،5 مىڭنان استام وزەكتى الەۋمەتتىك ماسەلە پارتيانىڭ باقىلاۋىنا الىندى.
كەزدەسۋدە نۇرسۇلتان نازاربايەۆقا سايلاۋالدى ينديكاتورلاردىڭ ورىندالۋ بارىسى تۋرالى ەسەپ بەرىلدى. سونداي-اق پارتيانىڭ جاستاردى جانە حالىقتىڭ الەۋمەتتىك تۇرعىدان از قامتىلعان توپتارىن قولداۋ شارالارى، وڭىرلەردە پارتيالىق باقىلاۋدى قامتاماسىز ەتۋ قىزمەتى تۋرالى اقپارات ۇسىنىلدى.
سوڭىندا ەلباسى پارتيانىڭ ورتالىق اپپاراتى مەن وڭىرلىك فيليالدارىنا ساياسي كەڭەستىڭ كەڭەيتىلگەن وتىرىسىن وتكىزۋگە جان-جاقتى دايىندىق جۇرگىزۋدى تاپسىردى.
