قازاقستاندا ەكسترەميستىك جانە تەرروريستىك ماتەريالداردى جاريالاعانى ءۇشىن اكىمشىلىك جاۋاپكەرشىلىك ەنگىزىلەدى، دەپ حابارلايدى Dala News.
ءماجىلىس باسپا ءسوز قىزمەتىنىڭ مالىمەتىنشە، ءتيىستى تۇزەتۋلەر اكىمشىلىك قۇقىق بۇزۋشىلىق تۋرالى كودەكسكە ەنگىزىلۋدە. بۇعان دەيىن مۇنداي ماتەريالداردى دايىنداۋ، ساقتاۋ، اكەلۋ، تاسىمالداۋ جانە تاراتۋ ءۇشىن جاۋاپكەرشىلىك قاراستىرىلعان بولسا، ەندى ولاردى جاريالاۋ دا جاۋاپكەرشىلىككە نەگىز بولادى.
«اكىمشىلىك قۇقىق بۇزۋشىلىق تۋرالى كودەكسكە ەنگىزىلگەن تۇزەتۋلەرگە سايكەس، ەكسترەميستىك جانە تەرروريستىك ماتەريالداردى جاريالاعانى ءۇشىن اكىمشىلىك جاۋاپكەرشىلىك ەنگىزىلەدى. بۇل نورما تەرروريزمگە جانە ەكسترەميزمگە قارسى ءىس-قيمىل تۋرالى زاڭدارمەن، سونداي-اق ازاماتتىق پروسەستىك كودەكسپەن سايكەستەندىرۋ ماقساتىندا قابىلدانىپ وتىر»، – دەلىنگەن حابارلامادا.
سونىمەن قاتار ازاماتتىق پروسەستىك كودەكسكە جانە «تەرروريزمگە قارسى ءىس-قيمىل تۋرالى»، «ەكسترەميزمگە قارسى ءىس-قيمىل تۋرالى» زاڭدارعا وزگەرىستەر ەنگىزىلىپ، ەكسترەميستىك جانە تەرروريستىك ماتەريالداردى تاسىمالداۋعا تىكەلەي تىيىم بەلگىلەنەدى.
بۇدان بولەك، تەرروريزمگە قارسى ءىس-قيمىل مەن ەكسترەميزمنىڭ الدىن الۋ سالاسىنا جاۋاپتى مەملەكەتتىك ورگانداردىڭ وكىلەتتىكتەرى ناقتىلاندى.
«سونداي-اق دەپۋتاتتار سالىق زاڭناماسىنا سايكەس بۇرىن اكىمشىلىك جاۋاپكەرشىلىككە تارتىلعان تۇلعالاردى اكىمشىلىك جازانى ورىنداۋدان بوساتۋدى كوزدەيتىن تۇزەتۋ ۇسىندى»، – دەپ مالىمدەدى ماجىلىستە.
قورىتىندىلاي كەلە، ەنگىزىلىپ جاتقان وزگەرىستەر زاڭنامانى بىرىزدەندىرۋگە جانە ەكسترەميزم مەن تەرروريزمگە قارسى شارالاردى كۇشەيتۋگە باعىتتالعان.
