استانادا وتكەن قىزىلوردا وبلىسىنىڭ مادەني كۇندەرى اياسىندا حالىقارالىق عارىش ستانسياسىنىڭ عارىشكەرلەرى EXPO-2017 كورمەسىنىڭ قوناقتارىمەن تىكەلەي بايلانىسقا شىقتى. بۇل سىيعا وبلىستىڭ قورىتىندى كونسەرتىنە بارعاندار كۋا بولدى.



حالىقارالىق عارىش ستانسياسىنان ءفودور يۋرچيحين مەن سەرگەي ريازانسكيي ءسوز الىپ، امفيتەاتر ساحناسىنداعى ۇلكەن ەكران ارقىلى EXPO قوناقتارى مەن قازاقستاندىقتارعا جانە جۇلدىزدى شاھار بايقوڭىر ورنالاسقان قىزىلورداعا عارىشتان جالىندى سالەم جولدادى. ولار بۇل كورمەنىڭ قازاقستان ءۇشىن عانا ەمەس، الەم ءۇشىن، بولاشاق ءۇشىن ماڭىزدى ەكەنىن تىلگە تيەك ەتكەن. قىزىلوردا وبلىسىنىڭ مادەني كۇندەرى اياسىندا مەرەكەلىك باعدارلامالار ءوتىپ، وبلىستىڭ تانىمال انشىلەرى، ونەر قايراتكەرلەرى، تەاتر ۇجىمى ءوز ونەرلەرىن كورسەتتى. استانا جۇرتشىلىعى وبلىستىڭ بۇگىنگى جانە وتكەندەگى احۋالىمەن، تاريحىمەن تانىسىپ، شەتەل تۋريستەرى بايقوڭىر ايلاعىنان ۇشقان عارىشكەرلەرمەن تىكەلەي بايلانىس ورناتىلعانىنا ريزالىق ءبىلدىردى.