ەكس-سۋديا سۆەتلانا جولمانوۆاعا قاتىستى سوت ءجارىسسوزى ءوتتى،- دەپ حابارلايدى Dalanews.kz.

الماتىنىڭ مەدەۋ اۋداندىق سوتىندا 1 ميلليارد تەڭگەگە جۋىق الاياقتىق ءىسى، ياعني 48 ەپيزود بويىنشا ايىپتالعان بۇرىنعى سۋديا سۆەتلانا جولمانوۆانىڭ ءىسى بويىنشا جارىسسوزدەر ءوتتى.

سوت وتىرىسىندا پروكۋرور ونى 6 جىل 8 ايعا باس بوستاندىعىنان ايىرۋدى سۇرادى.

بۇل ءىس تۋرالى نە بەلگىلى؟

سۆەتلانا جولمانوۆاعا قاتىستى ءىس الماتىداعى مەدەۋ اۋداندىق №2 سوتىندا قارالىپ جاتىر. وعان 1 ملرد تەڭگەنى الاياقتىق جولمەن يەمدەندى دەگەن ايىپ تاعىلعان. تەرگەۋ نۇسقاسىنا ساي ول ءتۇرلى تەندەرلەر مەن جىلجىمايتىن مۇلىك مامىلەلەرىنە كومەكتەسەمىن دەپ، وعان قوسا ەكس-اكىمنىڭ ايەلىمەن ارالاسامىن دەگەن سىلتاۋمەن ادامداردى الداعان. جۇمىستان كەتكەن سوڭ دا ءوزىن سۋديا رەتىندە تانىستىرىپ، اقشا بوپسالاۋدى جالعاستىرعان. قازىرگى تاڭدا 48 ەپيزود تىركەلگەن، جابىرلەنۋشىلەر اراسىندا سۋديالار دا بار.

ەكىنشى ايىپتالۋشى - بۇرىنعى پوليسەي دانيار قۇشالييەۆ. ب ا ق مالىمەتىنشە، ول بۇعان دەيىن پارا الۋ دەرەگى بويىنشا ۇستالعان.

بۇعان دەيىنگى ىستەرى

ايتا كەتەيىك، 2021 جىلدىڭ 28 ساۋىرىندە الماتى قالاسى مەدەۋ اۋداندىق سوتىنىڭ سۋدياسى سۆەتلانا جولمانوۆا الاياقتىق جاسادى دەگەن كۇدىككە ءىلىندى.

ءتىنتۋ كەزىندە سۋديانىڭ كابينەتىنەن 10 مىڭ دوللار تاركىلەنگەن. ول سوت شەشىمدەرىن بەلگىلى ءبىر ادامداردىڭ پايداسىنا شىعارۋعا كومەكتەسكەن دەگەن كۇدىككە ءىلىندى.

29 ساۋىردە جوعارعى سوت ءتوراعاسىنىڭ وكىمىمەن سۆەتلانا جولمانوۆانىڭ وكىلەتتىگى توقتاتىلدى.