دەپۋتات اسقار سادىقوۆ نە ءۇشىن پارتيادان شىعارىلعانى بەلگىلى بولدى، - دەپ حابارلايدى Dalanews.kz.
اقجول پارتياسىنىڭ جەتەكشىسى ازات پەرۋاشيەۆتىڭ سوزىنشە، پارتيا اتىنا اسقار سادىقوۆقا قاتىستى ءبىرقاتار شاعىم تۇسكەن، وندا ايتىلعان ءجايتتار پلەنۋمدا قارالىپ، ءتيىستى شەشىم شىعارىلعان.
"شاعىمداردىڭ دەنى ونىڭ تەرىس ىس-ارەكەتتەرىنە، اتاپ ايتقاندا، وكىلەتتىگىن اسىرا پايدالانۋ مەن ەتيكالىق نورمالاردى بۇزۋىنا بايلانىستى بولدى. شاعىمداردىڭ ءارقايسىسى بويىنشا جەكە-جەكە فاكتىلەر كەلتىرۋگە بولاتىن بولسا دا، ءبىر عانا مىسالدى اتاپ ءوتۋ جەتكىلىكتى دەپ ويلايمىن.
ماسەلەن، پارلامەنتتە (پارتيادا ەمەس) جۇمىس ىستەيتىن ءبىر ايەل ادام اسقار سادىقوۆتىڭ بىرنەشە رەت ۇياتسىز ۇسىنىستار جاساپ، قىسىم كورسەتكەنى تۋرالى ايتىپ ارىزداندى. ول ءوزىنىڭ سوزىنە دالەل رەتىندە ۆاتسابىنا اسقار سادىقوۆتان كەلىپ تۇسكەن حابارلامالاردىڭ سكرينىن كورسەتتى (ەتيكالىق سەبەپتەرتەرگە بايلانىستى ونىڭ بوپسالاۋىنا تاپ بولعان اتالعان جابىرلەنۋشىنىڭ ەسىمى جاسىرىلعان)"، - دەيدى پەرۋاشيەۆ.
ارىزدانۋشى 17 ساۋىردە وزىنە جازىلعان مۇنداي قورلاۋ ۇسىنىستاردى جاۋاپسىز قالدىرىپ، ەلەمەگەن ەكەن.
"الايدا، 15 مامىردا بۇل ارەكەتتەر تاعى قايتالانعان جانە ارىزدانۋشىنىڭ ايتۋىنشا، اسقار سادىقوۆ جىنىستىق بوپسالاۋدى جۇيەلى تۇردە باسقا كۇندەردە دە جالعاستىرعان. ءبىراق، سادىقوۆتىڭ دەپۋتاتتىق قول سۇعىلماۋشىلىققا يە ەكەندىگۋنە بايلانىستى، حارراسمەنتكە تاپ بولعان جابىرلەنۋشى قۇقىقتىق قورعاۋعا جۇگىنە الماعان.
پلەنۋم بارىسىندا وسىنداي اشكەرە بولعان زاڭسىز ارەكەتتەرگە جول بەرىلمەيتىندىگى تۋرالى ەسكەرتۋىمە جاۋاپ رەتىندە اسقار سادىقوۆ «ءوزىنىڭ دەپۋتات ەكەنىن جانە كىمگە نە قالاسا سونى ايتۋعا قۇقىلى ەكەندىگىن» ايتتى. سوندىقتان، ءبىز بۇل كەدەرگىنى الىپ تاستادىق، ال اسقار سادىقوۆتى دەپۋتاتتىق مارتەبەسىنەن ايىرۋ تۋرالى قابىلدانعان شەشىم جابىرلەنۋشىگە ار-نامىسى مەن قادىر-قاسيەتىن قورعاۋعا مۇمكىندىك بەرەدى"، - دەلىنگەن جازبادا.
ونىڭ لايىقسىز مىنەز-قۇلقىنىڭ باسقا دا فاكتىلەرى بار، سونىڭ نەگىزىندە وسىنداي شەشىم قابىلدانعان.
"ولاردىڭ كەيبىرەۋلەرى قۇقىق قورعاۋ ورگاندارىنىڭ دا نازارىن اۋدارۋى مۇمكىن، ونداي جاعدايدا قاجەتتى كومەك كورسەتۋگە دايىنبىز. كورىپ وتىرعاندارىڭىزداي، وتە لاس جاعداي بولعان. بىرەۋدىڭ حابارلامالارىن وقىپ، ونى جاريالاۋعا ەش قۇلقىم جوق ەدى. الايدا، ءبىزدىڭ ۇنسىزدىگىمىزدى بىرەۋلەر باسقاشا تۇسىنگەن سياقتى، سۇحباتتىڭ بىرىندە ءوزىن 1937 جىلعى رەپرەسسيالار قۇرباندارىمەن سالىستىرىپ، "شىندىق" ءۇشىن جازىم بولعانداي قىلىپ جەتكىزگەن ا. سادىقوۆ تا سوعان سەبەپشى. بۇل "شىندىقتىڭ" دا شىنايى بەت ءجۇزىن كورسەتۋگە ءماجبۇرمىز، ودان باسقا دا ەپيزودتار مەن قۇجاتتار جەتەرلىك"، - دەيدى ازات پەرۋاشيەۆ.
پلەنۋم ناقتى فاكتىلەرگە سۇيەنە وتىرىپ اسقار سادىقوۆتى پارتيادان شىعارۋ تۋرالى شەشىم قابىلداعان.
"سونىڭ ىشىندە، بۇل جاعدايلاردىڭ (بىرنەشەۋ) ودان دا ءقاۋىپتى سالدارى بولماس ءۇشىن.
وزگە ادامداردىڭ ار-نامىسى مەن جەكە ومىرىنە قاتىستى بولعاسىن بۇل جاعدايدى كوپشىلىك الدىنا شىعارۋ ماعان وتە جيىركەنىشتى بولسا دا، وسى ماسەلە توڭىرەگىندەگى داۋ-داماي مەن الىپ-قاشپا اڭگىمەلەردىڭ نۇكتەسىن قويۋعا ءماجبۇرمىن"، - دەپ ءتۇسىندىردى پەرۋاشيەۆ.
