مەكتەپتەگى بىلىقتى جايىپ سالىپ، ديرەكتوردىڭ قىزمەتىنەن الىنۋىنا تۇرتكى بولعان تارازدىق ءمۇعالىم جۇمىسقا قايتا قابىلداندى. جەرگىلىكتى باسشىلاردىڭ مالىمەتىنشە، ديرەكتور كۇنسۇلۋ بورىمبەكوۆانى قىزمەتىنەن بوساتاردا قاتەلىكتەرگە جول بەرگەن، دەپ حابارلايدى Dalanews.kz كتك تەلەارناسى.
ۋاليحان بايدۋانوۆ، تاراز قالالىق ءبىلىم ءبولىمى باسشىسىنىڭ مىندەتىن اتقارۋشى:
- بۇل جەردە ول كىسىنى جۇمىسقا قايتا ورنالاستىرۋ تۋرالى بۇيرىقتىڭ كۇشىن جويۋعا، ياعني ول بۇيرىقتى شىعاراتىن كەزدەگى ءتيىستى نەگىز بولاتىن قۇجاتتاردىڭ جەتكىلىكسىزدىگى سەبەپ بولىپ، كوميسسيا ول كىسىنى قايتادان جۇمىسقا ورنالاستىرۋ جونىندە شەشىم قابىلدادى.
اتاپ ايتقاندا، ديرەكتور قىزمەتتىك تەكسەرىس جۇرگىزبەگەن، ءارى قول استىنداعى ماماننان تۇسىنىكتەمە الماعان. وسى ەكى جاعداي بورىمبەكوۆانى كەرى قايتارۋعا نەگىز بولىپتى.
شۋ شىققان ءبىلىم وشاعىندا ءقازىر جان-جاقتى تەكسەرىس ءجۇرىپ جاتىر. سەبەبى، بىرنەشە ءمۇعالىم مەكتەپتەگى جەمقورلىق سيپاتىنداعى بىلىقتاردى جايىپ سالعان. ءقازىر وسىعان قاتىستى ءار ۇستازدان ساۋالناما الىنۋدا.
مامانداردىڭ ءۋاجى راستالسا، بۇل ىسپەن قۇزىرلى ورىندار اينالىسادى.
ەسكە سالساق، تارازداعى №43 مەكتەپتىڭ ءمۇعالىمى ءوزىنىڭ جۇمىستان نەگىزسىز شىعارىلعانىن ايتىپ، بەينەۇندەۋ جولداعان بولاتىن. بۇدان كەيىن جۋرناليستەر وسى ءبىلىم ورداسىنا جەتكەندە باسقا مۇعالىمدەر دە ايىلىن جيىپ قالماي، مەكتەپتى ديرەكتورى قالاي بازارعا اينالدىرعانىن ايتىپ بەرگەن. كۇنسۇلۋ بورىمبەكوۆانىڭ شاعىمى ءبىلىم جانە عىلىم ءمينيسترىنىڭ قۇلاعىنا جەتتى. اسحات ايماعامبەتوۆ كوميسسيا جۇمىسى اياقتالعانشا ديرەكتور ەلميرا ومىربەكوۆانى ۋاقىتشا قىزمەتىنەن شەتتەتۋگە بۇيرىق بەرگەن-دى.
