Mekteptegi bylyqty jaiyp salyp, direktordyń qyzmetinen alynýyna túrtki bolǵan tarazdyq muǵalim jumysqa qaita qabyldandy. Jergilikti basshylardyń málimetinshe, direktor Kúnsulý Bórimbekovany qyzmetinen bosatarda qatelikterge jol bergen, dep habarlaidy Dalanews.kz KTK telearnasy.
Ýalihan Baidýanov, Taraz qalalyq bilim bólimi basshysynyń mindetin atqarýshy:
- Bul jerde ol kisini jumysqa qaita ornalastyrý týraly buiryqtyń kúshin joiýǵa, iaǵni ol buiryqty shyǵaratyn kezdegi tiisti negiz bolatyn qujattardyń jetkiliksizdigi sebep bolyp, komissiia ol kisini qaitadan jumysqa ornalastyrý jóninde sheshim qabyldady.
Atap aitqanda, direktor qyzmettik tekseris júrgizbegen, ári qol astyndaǵy mamannan túsinikteme almaǵan. Osy eki jaǵdai Bórimbekovany keri qaitarýǵa negiz bolypty.
Shý shyqqan bilim oshaǵynda qazir jan-jaqty tekseris júrip jatyr. Sebebi, birneshe muǵalim mekteptegi jemqorlyq sipatyndaǵy bylyqtardy jaiyp salǵan. Qazir osyǵan qatysty ár ustazdan saýalnama alynýda.
Mamandardyń ýáji rastalsa, bul ispen quzyrly oryndar ainalysady.
Eske salsaq, Tarazdaǵy №43 mekteptiń muǵalimi óziniń jumystan negizsiz shyǵarylǵanyn aityp, beineúndeý joldaǵan bolatyn. Budan keiin jýrnalister osy bilim ordasyna jetkende basqa muǵalimder de aiylyn jiyp qalmai, mektepti direktory qalai bazarǵa ainaldyrǵanyn aityp bergen. Kúnsulý Bórimbekovanyń shaǵymy Bilim jáne ǵylym ministriniń qulaǵyna jetti. Ashat Aimaǵambetov komissiia jumysy aiaqtalǵansha direktor Elmira Ómirbekovany ýaqytsha qyzmetinen shettetýge buiryq bergen-di.
