«ديماش تانىمالدىلىققا يە بولعان كەزدە، بارلىق تانىستارىم مەن دە قازاق قىزى ەكەنىمدى ەسكە سالا باستادى. ديماش ءۇشىن جانە بارشا قازاق حالقى ءۇشىن كەۋدەمدى ماقتانىش كەرنەدى. سول كەزدە ديماشتىڭ انيمە-وبرازىن جاساپ، ول تۋرالى، ونىڭ اندەرى تۋرالى 3-4 مينۋتتىق انيماسيالىق فيلم ءتۇسىرۋ يدەياسى تۋىندادى»، – دەدى «Jebe Visual arts studio»-نىڭ تەڭ قۇرىلتايشىسى جارقىن مۇرات قىزى.
جارقىننىڭ شىڭجاڭ ۋنيۆەرسيتەتىن بىتىرگەننەن كەيىن، 6 جىل بۇرىن، بەيجىڭگە كەلىپ، نيەتتەس بىرنەشە اداممەن انيماسيالىق ستۋديالاردا جۇمىس ىستەي باستاعان. 2013 جىلى سە گوسيۋنمەن بىرلەسىپ، جاۋاپكەرشىلىگى شەكتەۋلى سەرىكتەستىك قۇرعان.
«قازىرگى ۋاقىتتا بىزدە 13 ادام جۇمىس ىستەيدى، ونىمدەرىمىزدىڭ دەنى جارنامالىق روليكتەر، 3D-فورماتقا وڭدەلگەن كوركەم جانە مۋلتيپليكاسيالىق فيلمدەردىڭ ەپيزودتارى. الداعى ۋاقىتتا وسكەلەڭ قازاق جاستارى ءۇشىن حالقىمىزدىڭ مادەنيەتىن، ءداستۇرىن ناسيحاتتايتىن مۋلتفيلمدەر سەرياسىن جاساۋدى جوسپارلاپ وتىرمىز. مۋلتفيلمدەر ارقىلى بالالارعا ۇلتتىق مادەنيەتكە دەگەن ماحابباتتى ءتيىمدى سىڭىرۋگە بولادى. قازاق ەرتەگىلەرى ەكراندا كورسەتىلىپ جۇرگەن «ديسنەي» مۋلتفيلمدەرىنەن ەش كەم تۇسپەيدى»، – دەدى جارقىن مۇرات قىزى.
Jebe انيماتورلارى ديماشتىڭ انيمە-وبرازىنان بولەك، قىتايعا تانىلعان قازاقستاندىق ۆولەيبولشى سابينا التىنبەكوۆانىڭ دا وبرازىن جاساعان. جۇڭگو قازاقتارى انيماسيا سالاسىندا ۇلكەن تابىستارعا قول جەتكىزۋدە.
