– بۇگىن دۋماننىڭ قولى جاراقاتتانعانى تۋرالى اقپارات ءتۇستى. ونىڭ قالاي جاراقاتتانعانىن ازىرگە بىلە المادىم. ونىڭ قولىنا بىردەڭە بولعان. دۋمان دەنەسىن جاراقاتتادى دەپ ويلامايمىن. كەزدەيسوق بولۋى دا مۇمكىن. ءدال وسى جاراقاتتىڭ سالدارىنان دۋماندى بۇگىن اۋرۋحاناعا تەكسەرۋگە اپارعان. وعان مەديسينالىق كومەك بەرىلگەن. ەكى ساعاتتان استام ۋاقىت اۋرۋحانادا بولعان. كەيىن تەرگەۋ يزولياتورىنا قايتا اكەلگەن، – دەدى ادۆوكات سەنبى كۇنى ازاتتىققا.
ونىڭ سوزىنشە، 8 قىركۇيەكتە تەرگەۋ سوتى ءجۋرناليستىڭ قاماۋ مەرزىمىن تاعى ءبىر ايعا، ياعني 22 قازانعا دەيىن سوزعان.
ادۆوكاتتىڭ ايتۋىنشا، 1 قىركۇيەكتەن بەرى اشتىق ۇستاپ جاتقان ءجۋرناليستىڭ دەنساۋلىعى ناشار. "ول تۇرا المايدى. كەزدەسۋگە شىعا المايدى" دەدى عالىم نۇرپەيىسوۆ. قىركۇيەك باسىنان بەرى جۋرناليست ءوزىن دارىگەرلەرگە قاراتۋدى تالاپ ەتىپ، اشتىق جاريالاعان.
ءبىر كۇن بۇرىن قىلمىستىق اتقارۋ جۇيەسى كوميتەتى (قاجك) "جۋرناليست تالدىقورعانداعى كوپ سالالى اۋرۋحاناعا جەتكىزىلىپ، تەراپيەۆت دارىگەرگە قاراتىلدى" دەپ حابارلاعان. الايدا ادۆوكاتتىڭ ايتۋىنشا، ونى ءتيىستى دارەجەدە تەكسەرىپ، اۋرۋحاناعا جاتقىزباعان، سول سەبەپتى جۋرناليست اشتىعىن جالعاستىرعان.
سەنبى كۇنى ازاتتىق ءتىلشىسى جۋرناليست وتىرعان قاماۋ مەكەمەسىنەن جاۋاپ الا المادى.
قاجك 8 قىركۇيەك كۇنگى حابارلاماسىندا ءجۋرناليستىڭ دەنساۋلىعىن "ورتاشا قالىپتى" دەپ باعالاپ، "دارىگەرلەر ونى اۋرۋحاناعا جاتقىزۋعا قاجەتتىلىك جوق دەپ تاپتى" دەپ حابارلاعان. ال ءجۋرناليستىڭ جاقىندارى مەن جاقتاستارى دۋمان مۇحاممەدكارىمنىڭ دەنساۋلىعىنا الاڭداپ وتىر. 7 قىركۇيەكتە ءجۋرناليستىڭ اكەسى الماز تىلەپوۆ شامامەن 230 شاقىرىم جەردەگى تالدىقورعانداعى تەرگەۋ يزولياتورىنا بارىپ، ۇلىنا جولىقپاق بولعان. الايدا ول ۇلىن كورە الماي قايتقان. ايتۋىنشا، ۇلى السىرەگەندىكتەن كەزدەسۋ بولمەسىنە بارا الماعان.
بيلىكتى سىناعان جۋرناليست دۋمان مۇحاممەدكارىم “تىيىم سالىنعان ۇيىم ىسىنە ارالاسۋ” جانە “ەكسترەميزمدى قارجىلاندىرۋ” باپتارى بويىنشا كۇدىككە ىلىنگەن. وعان مۇنداي ايىپتىڭ تاعىلۋىنا قۋعىنداعى ەكس-بانكير، وپپوزيسيالىق ساياساتكەر مۇحتار ءابليازوۆتان العان سۇحباتى تۇرتكى بولعان. ءابليازوۆ قۇرعان قدت قوزعالىسىن قازاقستان بيلىگى "ەكسترەميستىك ۇيىم" دەپ تانىپ، قىزمەتىنە ەل اۋماعىندا تىيىم سالعان. ال 2019 جىلى ەۋروپارلامەنت قدت-نى "بەيبىت وپپوزيسيالىق قوزعالىس" دەپ اتاعان.
