– Búgin Dýmannyń qoly jaraqattanǵany týraly aqparat tústi. Onyń qalai jaraqattanǵanyn ázirge bile almadym. Onyń qolyna birdeńe bolǵan. Dýman denesin jaraqattady dep oilamaimyn. Kezdeisoq bolýy da múmkin. Dál osy jaraqattyń saldarynan Dýmandy búgin aýrýhanaǵa tekserýge aparǵan. Oǵan meditsinalyq kómek berilgen. Eki saǵattan astam ýaqyt aýrýhanada bolǵan. Keiin tergeý izoliatoryna qaita ákelgen, – dedi advokat senbi kúni Azattyqqa.
Onyń sózinshe, 8 qyrkúiekte tergeý soty jýrnalistiń qamaý merzimin taǵy bir aiǵa, iaǵni 22 qazanǵa deiin sozǵan.
Advokattyń aitýynsha, 1 qyrkúiekten beri ashtyq ustap jatqan jýrnalistiń densaýlyǵy nashar. "Ol tura almaidy. Kezdesýge shyǵa almaidy" dedi Ǵalym Nurpeiisov. Qyrkúiek basynan beri jýrnalist ózin dárigerlerge qaratýdy talap etip, ashtyq jariialaǵan.
Bir kún buryn qylmystyq atqarý júiesi komiteti (QAJK) "jýrnalist Taldyqorǵandaǵy kóp salaly aýrýhanaǵa jetkizilip, terapevt dárigerge qaratyldy" dep habarlaǵan. Alaida advokattyń aitýynsha, ony tiisti dárejede tekserip, aýrýhanaǵa jatqyzbaǵan, sol sebepti jýrnalist ashtyǵyn jalǵastyrǵan.
Senbi kúni Azattyq tilshisi jýrnalist otyrǵan qamaý mekemesinen jaýap ala almady.
QAJK 8 qyrkúiek kúngi habarlamasynda jýrnalistiń densaýlyǵyn "ortasha qalypty" dep baǵalap, "dárigerler ony aýrýhanaǵa jatqyzýǵa qajettilik joq dep tapty" dep habarlaǵan. Al jýrnalistiń jaqyndary men jaqtastary Dýman Muhammedkárimniń densaýlyǵyna alańdap otyr. 7 qyrkúiekte jýrnalistiń ákesi Almaz Tilepov shamamen 230 shaqyrym jerdegi Taldyqorǵandaǵy tergeý izoliatoryna baryp, ulyna jolyqpaq bolǵan. Alaida ol ulyn kóre almai qaitqan. Aitýynsha, uly álsiregendikten kezdesý bólmesine bara almaǵan.
Bilikti synaǵan jýrnalist Dýman Muhammedkárim “tyiym salynǵan uiym isine aralasý” jáne “ekstremizmdi qarjylandyrý” baptary boiynsha kúdikke ilingen. Oǵan mundai aiyptyń taǵylýyna qýǵyndaǵy eks-bankir, oppozitsiialyq saiasatker Muhtar Ábliazovtan alǵan suhbaty túrtki bolǵan. Ábliazov qurǵan QDT qozǵalysyn Qazaqstan biligi "ekstremistik uiym" dep tanyp, qyzmetine el aýmaǵynda tyiym salǵan. Al 2019 jyly Eýroparlament QDT-ny "beibit oppozitsiialyq qozǵalys" dep ataǵan.
