جازۋشى، دراماتۋرگ، مەملەكەتتىك سىيلىقتىڭ يەگەرى دۋلات يسابەكوۆ ەكس-پرەزيدەنت نۇرسۇلتان نازاربايەۆتىڭ ۇتقان تۇسى مەن جىبەرگەن قاتەسى جونىندە اڭگىمە ءوربىتتى، - دەپ حابارلايدى Dalanews.kz.
جازۋشى ءبىر كەزدەرى نازاربايەۆپەن ارالارىندا ۇلكەن داۋ بولعانىن جاسىرمادى.
"شىندىقتى ايتساڭ، حالىققا جاعاسىڭ، بيلىككە جاقپايسىڭ. شىندىقتى ايتىپ كەلدىك قوي. نازاربايەۆتىڭ كەزىندە كوپ ايتىلدى. ۇلكەن ماقالا جازدىم. ەكەۋمىز كابينەتىندە قالاي سالعىلاستىق؟! ول مەنى سوتقا بەرەمىن دەگەنگە شەيىن بارىپ، ارامىزدا ۇلكەن داۋ بولعان، ءبىراق كەيىننەن تاتۋلاستىق.
ءوزىمىز ءدۇرداراز بولىپ جۇرگەن كەزدە لوندوندا پەسام قويىلاتىن بولدى. تۇڭعىش رەت لوندونداعى قازاق پەاساسى. سوعان ءوزى شاقىرىپ الىپ، ازاماتتىعىنا ريزامىن، باياعىنىڭ ءبارىن كەشىرىپ، "سەنى شاقىرىپ وتىرعانىم: قازاق پەساسىن لوندون قويىپ جاتىر ەكەن. قازاق پەساسىن قازاقستانداعى ورىس تەاترلارى قويمايدى. سوناۋ لوندوندا پەساڭ قويىلعانىنا قۋانامىن" دەپ نازاربايەۆ دەگەن شۆەيساريالىق ساعاتىن بەرىپ، ريزا بولىپ شىعارىپ سالىپ ەدى. نۇرەكەڭنىڭ ءبىر جاقسى جەرى ادەبيەتتى بىلەدى جانە وقيدى. كوپ جازۋشى جايلى پىكىرى بولاتىن. ءبىزدى قابىلداعان كەزدە دە جاقسى سويلەسەتىن، پروسەستىڭ ىشىنە كىرىپ سويلەسەتىن. ءقازىر جازۋشىلار توقىراپ قالدى، بيلىكپەن شارۋاسى جوق، بيلىكتىڭ جازۋشىلارمەن شارۋاسى جوق"، - دەدى يسابەكوۆ "كۇلتوبە" ارناسىنا.
بەلگىلى دراماتۋرگ دۋلات يسابەكوۆ نازاربايەۆتىڭ ولجاسى قازاق شەكاراسىن شەگەندەگەنى ەكەنىن، دەگەنمەن اكتيۆتەرگە قاتىستى قاۋەسەت راس بوپ شىقسا، بۇل كەشىرىلمەيتىن كۇنا بولاتىنىن ايتتى.
"نازاربايەۆتىڭ قالاي بولعاندا دا ەكى جاقتى مىنەزى بار: جاقسىلىعىن ايتايىق، شەكارامىزدى بەكىتتى. ۋكراينانىڭ تراگەدياسى - شەكاراسىن بەكىتپەگەنى، ءبىزدىڭ شەكارامىز بەكىتىلگەن. ەندى ونى ەشكىم بۇزا المايدى، بۇزسا، سوڭى ازاماتتىق سوعىس بولادى. ءبىراق قازاقستاننىڭ كوپ بايلىعىن يەمدەنىپ كەتتى دەگەن قاۋەسەت بار. سونى جۇرت كوپ ايتادى. 200 ميلليارد دوللار اقشاسى بار دەپ ەستىدىم. قازاقستاننىڭ ءبىر جىلدىق بيۋدجەتى - 4 ميلليارد دوللار. قازاقستاننىڭ جارتى بايلىعى دەمەك ءبىزدىڭ بۇرىنعى پرەزيدەنتىمىزدە. بۇل راس بولسا، ارينە، پرەزيدەنت ءۇشىن كەشىرىلمەيتىن كۇنا. ءوزىم سەنگىم كەلمەيدى.
ءبىر ادام قازاقستاننىڭ جارتى بايلىعىن نە ىستەي الادى؟ بۇل جونىندە نازاربايەۆ ەكەۋمىز بيلىكتە وتىرعان كەزىندە سويلەستىك. ەكىنشى رەت لوندونعا بارا جاتقان كەزدە تاعى دا سويلەستىك. "قازاقستاننىڭ بايلىعى جەتەدى. مۇحتار ءابىليازوۆ، كوپتەگەن ادام 10 ميلليارد دوللارمەن شەتەلگە قاشىپ كەتىپ جاتىر. سولاردى نەگە قايتارمايمىز؟ 100 ميلليون دوللارىم بولسا، قالاي جۇمسارىمدى بىلمەس ەدىم" دەگەن ەدىم. وزىنە ءتيىپ كەتكەن ەكەن عوي. "مەندە دە 100 ميلليون دوللار بار" دەدى. "10 ميلليارد دوللارى بار ادامدار ومىرىندە ونى جاراتىپ ۇلگەرە المايدى، ءبارى شەتەلدىڭ بانكىسىندە جاتىر" دەدىم. وزىنە دە ءتيىسىپ تۇرمىن عوي. ...تۇبىمىزگە قاناعاتسىزدىق جەتەتىن ءتۇرى بار. جاپ-جاقسى جۇرگەن جىگىتتەر بيلىككە بارسا، 5-6 جىلدان كەيىن قىلمىستارىن كورە باستايسىڭ، اقشا جەپ قويعان. جەمقورلاردى سىناپ جۇرگەن جىگىتتەردىڭ ءوزى جەمقور بولىپ شىعا كەلگەنىن تۇسىنبەيمىن"، - دەدى ول "كۇلتوبە" ارناسىنا.
سونىمەن قاتار، جازۋشىنىڭ پىكىرىنشە، ءبىر كەزدە نازاربايەۆقا ولەڭ ارناپ، ەندى جامانداۋ - ەكىجۇزدىلىك.
"سول كەزدە پوەما جازعان ادامدار ەندى كەلىپ سونى سىناي باستادى. دەمەك ەكىجۇزدىلىك دەگەن - وسى. سول كەزدە ماقتاپ پىكىر ايتقان ەمەسپىن. ...اسىرەسە، اقىندارعا رەنىشىم بار. بيلىكتەگى ءتوتاليتاريزمدى كوبىنە ءبىزدىڭ اقىندار جاساعان ەكەن"، - دەدى دۋلات يسابەكوۆ.
مەملەكەتتىك سىيلىقتىڭ يەگەرى دۋلات يسابەكوۆ مارقۇم ساياساتكەر زامانبەك ءنۇرقادىلوۆ تۋرالى دا وزىندىك پىكىرىن ءبىلدىردى.
"زامانبەك نۇرقادىلوۆپەن بەتپە-بەت سويلەسىپ تە كورگەن اداممىن. ءبىراق ونىڭ ۇرما مىنەزى بار، سول مىنەزىنەن ءوزى زارداپ شەگەدى. ساياساتتا بۇگىلمەلى-يىلمەلى ساياسات بولۋى كەرەك. ساياساتتا وتە ساقتىقپەن سويلەۋى كەرەك. پىكىر ايتقاندا ارىنا تيمەي ايتۋىڭ كەرەك. زامانبەكتىڭ ءبىر قاتەلىگى نازاربايەۆقا تىكەلەي ءتيىسۋى بولدى. "ەكەۋمىز دە جۇرتقا تانىمالمىز، كەل، ايتىسايىق" دەگەن سياقتى. پرەزيدەنتتەرگە ولاي ايتۋعا بولمايدى. ...ساياسات دەگەندە ادام ساق بولۋ كەرەك. ماقتامەن باۋىزدايتىنداي قىلىپ ايتۋ كەرەك. اشىق كەتكەن ادامدى قۇرتا سالۋ وپ-وڭاي. زامانبەك تە سولاي اشىق كەتتى دە، التىنبەك ەكەۋىن قۇرتا سالدى، اتتى دا تاستادى. ويتكەنى قولىندا بيلىك بار"، - دەدى جازۋشى "كۇلتوبە" ارناسىنا.
