Jazýshy, dramatýrg, Memlekettik syilyqtyń iegeri Dýlat Isabekov eks-prezident Nursultan Nazarbaevtyń utqan tusy men jibergen qatesi jóninde áńgime órbitti, - dep habarlaidy Dalanews.kz.
Jazýshy bir kezderi Nazarbaevpen aralarynda úlken daý bolǵanyn jasyrmady.
"Shyndyqty aitsań, halyqqa jaǵasyń, bilikke jaqpaisyń. Shyndyqty aityp keldik qoi. Nazarbaevtyń kezinde kóp aityldy. Úlken maqala jazdym. Ekeýmiz kabinetinde qalai salǵylastyq?! Ol meni sotqa beremin degenge sheiin baryp, aramyzda úlken daý bolǵan, biraq keiinnen tatýlastyq.
Ózimiz dúrdaraz bolyp júrgen kezde Londonda pesam qoiylatyn boldy. Tuńǵysh ret Londondaǵy qazaq peasasy. Soǵan ózi shaqyryp alyp, azamattyǵyna rizamyn, baiaǵynyń bárin keshirip, "seni shaqyryp otyrǵanym: qazaq pesasyn London qoiyp jatyr eken. Qazaq pesasyn Qazaqstandaǵy orys teatrlary qoimaidy. Sonaý Londonda pesań qoiylǵanyna qýanamyn" dep Nazarbaev degen shveitsariialyq saǵatyn berip, riza bolyp shyǵaryp salyp edi. Nurekeńniń bir jaqsy jeri ádebietti biledi jáne oqidy. Kóp jazýshy jaily pikiri bolatyn. Bizdi qabyldaǵan kezde de jaqsy sóilesetin, protsestiń ishine kirip sóilesetin. Qazir jazýshylar toqyrap qaldy, bilikpen sharýasy joq, biliktiń jazýshylarmen sharýasy joq", - dedi Isabekov "Kúltóbe" arnasyna.
Belgili dramatýrg Dýlat Isabekov Nazarbaevtyń oljasy qazaq shekarasyn shegendegeni ekenin, degenmen aktivterge qatysty qaýeset ras bop shyqsa, bul keshirilmeitin kúná bolatynyn aitty.
"Nazarbaevtyń qalai bolǵanda da eki jaqty minezi bar: jaqsylyǵyn aitaiyq, shekaramyzdy bekitti. Ýkrainanyń tragediiasy - shekarasyn bekitpegeni, bizdiń shekaramyz bekitilgen. Endi ony eshkim buza almaidy, buzsa, sońy azamattyq soǵys bolady. Biraq Qazaqstannyń kóp bailyǵyn iemdenip ketti degen qaýeset bar. Sony jurt kóp aitady. 200 milliard dollar aqshasy bar dep estidim. Qazaqstannyń bir jyldyq biýdjeti - 4 milliard dollar. Qazaqstannyń jarty bailyǵy demek bizdiń burynǵy prezidentimizde. Bul ras bolsa, árine, prezident úshin keshirilmeitin kúná. Ózim sengim kelmeidi.
Bir adam Qazaqstannyń jarty bailyǵyn ne istei alady? Bul jóninde Nazarbaev ekeýmiz bilikte otyrǵan kezinde sóilestik. Ekinshi ret Londonǵa bara jatqan kezde taǵy da sóilestik. "Qazaqstannyń bailyǵy jetedi. Muhtar Ábiliazov, kóptegen adam 10 milliard dollarmen shetelge qashyp ketip jatyr. Solardy nege qaitarmaimyz? 100 million dollarym bolsa, qalai jumsarymdy bilmes edim" degen edim. Ózine tiip ketken eken ǵoi. "Mende de 100 million dollar bar" dedi. "10 milliard dollary bar adamdar ómirinde ony jaratyp úlgere almaidy, bári sheteldiń bankisinde jatyr" dedim. Ózine de tiisip turmyn ǵoi. ...Túbimizge qanaǵatsyzdyq jetetin túri bar. Jap-jaqsy júrgen jigitter bilikke barsa, 5-6 jyldan keiin qylmystaryn kóre bastaisyń, aqsha jep qoiǵan. Jemqorlardy synap júrgen jigitterdiń ózi jemqor bolyp shyǵa kelgenin túsinbeimin", - dedi ol "Kúltóbe" arnasyna.
Sonymen qatar, jazýshynyń pikirinshe, bir kezde Nazarbaevqa óleń arnap, endi jamandaý - ekijúzdilik.
"Sol kezde poema jazǵan adamdar endi kelip sony synai bastady. Demek ekijúzdilik degen - osy. Sol kezde maqtap pikir aitqan emespin. ...Ásirese, aqyndarǵa renishim bar. Biliktegi totalitarizmdi kóbine bizdiń aqyndar jasaǵan eken", - dedi Dýlat Isabekov.
Memlekettik syilyqtyń iegeri Dýlat Isabekov marqum saiasatker Zamanbek Nurqadilov týraly da ózindik pikirin bildirdi.
"Zamanbek Nurqadilovpen betpe-bet sóilesip te kórgen adammyn. Biraq onyń urma minezi bar, sol minezinen ózi zardap shegedi. Saiasatta búgilmeli-iilmeli saiasat bolýy kerek. Saiasatta óte saqtyqpen sóileýi kerek. Pikir aitqanda aryna timei aitýyń kerek. Zamanbektiń bir qateligi Nazarbaevqa tikelei tiisýi boldy. "Ekeýmiz de jurtqa tanymalmyz, kel, aitysaiyq" degen siiaqty. Prezidentterge olai aitýǵa bolmaidy. ...Saiasat degende adam saq bolý kerek. Maqtamen baýyzdaityndai qylyp aitý kerek. Ashyq ketken adamdy qurta salý op-ońai. Zamanbek te solai ashyq ketti de, Altynbek ekeýin qurta saldy, atty da tastady. Óitkeni qolynda bilik bar", - dedi jazýshy "Kúltóbe" arnasyna.
