تۇركىستان قالاسىنداعى «دوستىق ۇيىندە» قازاقستان حالقى اسسامبلەياسى اقساقالدار كەڭەسىنىڭ رەسپۋبليكالىق وتىرىسى ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ءىس-شاراعا قحا ءتوراعاسىنىڭ ورىنباسارى، ق ر پرەزيدەنتى اكىمشىلىگى – قحا حاتشىلىعىنىڭ مەڭگەرۋشىسى مارات ءازىلحانوۆ، ق ر مادەنيەت جانە اقپارات مينيسترلىگى ەتنوسارالىق قاتىناستاردى دامىتۋ كوميتەتىنىڭ ءتوراعاسى عالىم شويكين، تۇركىستان وبلىسى قوعامدىق دامۋ باسقارماسىنىڭ باسشىسى ەرلان كۇزەمبايەۆ، وبلىستىق «قوعامدىق كەلىسىم» كمم باسشىسى ەلميرا جانعازييەۆا جانە قولدانبالى ەتنوساياسي زەرتتەۋلەر ينستيتۋتىنىڭ ديرەكتورى تالعات قالييەۆ، سونداي-اق اقساقالدار كەڭەسىنىڭ ءتوراعالارى مەن مۇشەلەرى قاتىستى.
مەملەكەت باسشىسى قاسىم-جومارت توقايەۆ بىلتىر قازاقستان حالقى اسسامبلەياسى شەڭبەرىندە اقساقالدار كەڭەسىن قۇرۋدى تاپسىرعان ەدى. بۇل ورايدا، ەلىمىزدە 1200-دەن استام اقساقالدار كەڭەسى قۇرىلىپ، ەل ىنتىماعىن ارتتىرۋ جولىندا جۇمىس ىستەپ جاتىر. ولاردىڭ قۇرامىنا تانىمال تۇلعالار، قوعامدىق پىكىر كوشباسشىلارى، ەتنومادەني، ارداگەرلەر بىرلەستىكتەرى مەن باسقا دا قوعامدىق ۇيىمداردىڭ وكىلى كىردى. جالپى، ءارتۇرلى دەڭگەيدەگى كەڭەس قۇرامىندا 7 مىڭنان اسا ازامات بار.
كەلەلى كەڭەستە ءسوز العان قحا ءتوراعاسىنىڭ ورىنباسارى مارات ءازىلحانوۆ قازاقستاننىڭ ءار وڭىرىنەن كەلگەن ابىز اقساقالداردىڭ جاڭا «دوستىق ۇيىندەگى» وتىرىسى جاقسىلىقتىڭ نىشانى ەكەنىن ايتا كەلە، بۇل نىسان بارشا تۇركىستاندىقتاردىڭ باس قوساتىن بەرەكەلى عيماراتىنا اينالاتىنا سەنىم ءبىلدىردى.
– قازاق قوعامىندا اقساقالدار – دانالىق پەن ادىلدىكتىڭ سيمۆولى. ولار بەيبىتشىلىك پەن بىرلىكتى ساقتاي وتىرىپ، ەل اراسىنداعى ماسەلەلەردى شەشۋدە ءادىل تورەلىگىن ايتقان. بۇگىن دە سىزدەردىڭ ومىرلىك تاجىريبەلەرىڭىز بەن اقىل-كەڭەستەرىڭىز جاستارعا دۇرىس جول سىلتەپ، ۇلتتىق قۇندىلىقتاردى، ادىلەتتىلىكتى ساناسىنا سىڭىرۋگە سەپتىگىن تيگىزە الادى. بۇل ورايدا، اسا ماڭىزدى مىندەتىمىز – ادال ازاماتتاردى تاربيەلەۋ. پرەزيدەنت ايتقانداي، «ادال ازامات» – بۇل ەڭ ۇزدىك قاسيەتتەرگە يە، ادال ەڭبەك ەتىپ، تابىسقا جەتىپ، ادالدىق پەن ادىلەتتىلىكتى بارىنەن جوعارى قوياتىن تۇلعا».
اقساقالدار كەڭەسىنىڭ قىزمەتى اياسىندا ءاربىر ازاماتتىڭ ساناسىنا وسى قۇندىلىقتاردى تىڭعىلىقتى جەتكىزۋ ءبىزدىڭ ەڭ باستى مىندەتىمىز. سونىمەن قاتار قوعامداعى بەس الەۋمەتتىك كەسەلمەن جالپىۇلتتىق كۇرەسكە جۇمىلۋ، پرەزيدەنت جاريالاعان جۇمىسشى ماماندىقتار جىلى اياسىندا، ءار وڭىردە ەلگە سىيلى ەڭبەك ادامدارىن دارىپتەي وتىرىپ جاستارعا كاسىبي باعدار بەرىپ، ەڭبەكسۇيگىشتىككە باۋلۋ ماڭىزدى، – دەدى مارات الماس ۇلى.
عالىم شويكين ءوز سوزىندە اقساقالداردىڭ ەتنوسارالىق سالاداعى مەملەكەتتىك ساياساتتى ىسكە اسىرۋداعى ءرولىنىڭ ماڭىزدىلىعىنا توقتالىپ، ولاردىڭ قاتىسۋى قوعامدا بەيبىتشىلىك پەن تۇراقتىلىقتى ساقتاۋعا ىقپال ەتەتىنىن اتاپ ءوتتى.
باسقوسۋدا ەلىمىزدىڭ ءار ايماعىنان كەلگەن اقساقالدار جاستاردى پاتريوتتىق رۋحتا تاربيەلەۋ، ەل بىرلىگىن نىعايتۋ جولىندا حالىقپەن، مەملەكەتتىك قۇرىلىم وكىلدەرىمەن كەزدەسۋلەردىڭ ماڭىزى جونىندە ۇسىنىس-پىكىرلەرىن ورتاعا سالىپ، جۇمىس تاجىريبەلەرىمەن ءبولىستى.
جالپى، وڭىرلىك اقساقالدار كەڭەسىنىڭ وكىلدەرى وتىرىسقا وڭ باعا بەرىپ، مۇنداي شارالاردى الداعى ۋاقىتتا ءداستۇرلى تۇردە وتكىزۋدى ۇسىندى.
