بەلگىلى ساياساتتانۋشى دوس كوشىم باس-اياعى تولىق ەمەس جەر زاڭىنا باعا بەرە المايتىنىن ايتتى، دەپ حابارلايدى Sputnik قازاقستان.
«موراتوريي نە ءۇشىن جاريالاندى؟ موراتوريي زاڭدى وزگەرتۋگە، قابىلداۋعا جاريالانعان جوق، زاڭدى قولدانۋعا جاريالاندى. سوندا ءبىز بەس جىلدىڭ ىشىندە نەنى كۇتىپ وتىرمىز. بىزگە نە بوگەت بولىپ وتىر؟ جەر كودەكسىنە وزگەرىستەر مەن تولىقتىرۋلار ەنگىزۋ تۋرالى مۇمكىندىك بەرىلدى ەكەن، نەگە ءبىز سوندا موراتوريي جاريالاعان باپتاردىڭ ءبارىن وزگەرتپەيمىز؟ 5 جىل بويى قۇر وتىرىپ، بەس جىل بىتكەننەن كەيىن وزگەرتەمىز دەيمىز بە؟!
بۇل سۇراق، مەنىڭ ويىمشا، ەڭ ماڭىزدى ماسەلە. ەگەر زاڭدى وزگەرتۋ تۋرالى ماسەلە تۋىنداپ وتىرسا، نەگە بەس جىل بويى كۇتۋىمىز كەرەك؟ وسى ماسەلە مەن ءۇشىن تۇسىنىكسىز»، — دەدى كوشىم.
ساياساتتانۋشى وسى رەتتە قازاقستاننىڭ زاڭدارىن ادام ۇعىنا المايتىن قىتايدىڭ يەروگليفتەرىنە تەڭەدى. ونىڭ ايتۋىنشا،
ءبىزدىڭ زاڭدى ءتۇسىنۋ ءۇشىن تاعى بەس ينستيتۋت، بەس ءجۇز زاڭگەر كەرەك.
«ءۇشىنشى ماسەلە زاڭدارعا قاتىستى.
ءبىزدىڭ زاڭىمىز قىتايدىڭ يەروگليفتەرى سياقتى. زاڭىمىزدى ءتۇسىندىرۋ ءۇشىن تاعى بەس ينستيتۋت، 500 زاڭگەر كەرەك.
كەز-كەلگەن زاڭدى قاراپ شىقساڭىز، «ەگەر قازاقستاننىڭ باسقا زاڭدارىندا كوزدەلمەسە»، دەگەن سىڭايدا جازىلعان سويلەمدەردى كەزىكتىرۋگە بولادى. سوندا ءبىز ونىڭ كوزدەلگەن-كوزدەلمەگەنىن ءبىلۋ ءۇشىن ءۇش ءجۇز زاڭدى قاراپ شىعۋىمىز كەرەك پە؟ زاڭ ناقتى بولۋى كەرەك!
مۇمكىن، كەڭەس وكىمەتىنەن قالعان دۇنيە شىعار، كىم ءبىلسىن. ءبىز ەندى مۇنى وزگەرتەيىك.
ەكى-اق نارسە عوي جازىلاتىن: جەر ەشكىمگە ساتىلمايدى. اۋىلشارۋاشىلىق جەرى دەگەندى قوسىپ قويىڭدار. ەكىنشىسى، جەر شەتەلدىك كومپانيالارعا بەرىلمەيدى. بولدى وسىمەن، سوسىن وسى ەكى نورمانى حالىققا كورسەتىڭدەر»، — دەدى كوشىم.
ساياساتتانۋشى ۇرانداتىپ كوشەگە شىققان حالىقتىڭ ەكى تالابى ورىندالماي، زاڭعا باعا بەرە المايتىنىن ايتتى.
«زاڭ تولىق بولۋ كەرەك، تولىق باعا بەرىلۋ كەرەك. جاڭاعى حالىقتىڭ كوتەرىلىپ، كوشەگە شىققان ەكى نەگىزگى ماسەلەسى شەشىلمەي تۇرعان ۋاقىتتا بۇل زاڭعا مەن باعا بەرە المايمىن. بارلىق دەنەسى بار، باسى جوق، جۇرەگى مەن جانى جوق. جايىلىمدىق جەر، شەكارا ايماقتارىنداعى ماسەلە، جەردى ءبولۋ كەزىندەگى ونىڭ اشىقتىعى مەن جاريالىعى – مۇنىڭ ءبارى كىرگەن، تاماشا. ءجۇز پايىز قولداۋ مۇمكىن ەمەس. زاڭ اركىمگە بىردەي تەڭ كەلمەيدى»،- دەدى ول.
«ءبىراق ەگەر زاڭ تولىق بولماسا، بۇل ايقاي، سەنىمسىزدىك ءالى كۇنگە دەيىن قالادى.
ءبىر عانا ءۇمىتىم بار، قۇدايعا شۇكىر قازاقستاندا كوشە بار، 70 پايىزداي قازاق بار»، — دەپ تۇيىندەدى ءسوزىن ساياساتتانۋشى.
