ءدىني الاۋىزدىقتى قوزدىرعانى ءۇشىن ىزدەۋدە جۇرگەن قازاقستان ازاماتى رەسەيدەن قايتارىلدى، دەپ حابارلايدى Dalanews.kz.
"كۇدىكتى 2016-2017 جىلدارى الماتى قالاسىندا بىرنەشە رەت ءدىني الاۋىزدىقتى قوزدىرۋعا، ازاماتتاردىڭ ءدىني سەزىمدەرىن قورلاۋعا، ازاماتتاردىڭ دىنگە دەگەن كوزقاراسى نەگىزىندە ولاردىڭ ەكسكليۋزيۆتىلىگىن، ارتىقشىلىعىن جانە كەمىستىگىن ناسيحاتتاۋعا باعىتتالعان ارەكەتتەر جاساعان"، - دەپ جازىلعان باس پروكۋراتۋرا حابارلاماسىندا.
بۇل قىلمىستىڭ وزگە دە قاتىسۋشىلارى ءارتۇرلى جاۋاپتىلىققا تارتىلدى، ال كۇدىكتى قىلمىس جاساعاننان كەيىن بوي تاسالاپ، حالىقارالىق ىزدەۋگە جاريالاندى.
وسىدان كەيىن 2017 جىلى كۇدىكتى ماسكەۋدە قاراقشىلىق جاساپ، سوتتالعان.
رەسەيدە جازاسىن وتەگەننەن كەيىن اتالعان ادام قىلمىستىق جاۋاپكەرشىلىككە تارتۋ ءۇشىن قازاقستانعا قايتارىلدى.
قازىرگى ۋاقىتتا كۇدىكتى تەرگەۋ يزولياتورىنا قامالدى.
اتالعان قىلمىستى جاساعانى ءۇشىن بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
