گارۆارد ۋنيۆەرسەتيتىنىڭ تۇلەگى، "مازمۇنداما" باسپاسىنىڭ نەگىزىن قالاۋشىسى شىڭعىس مۇقان ءدىن مەن ساۋاتسىزدىق قوسىلسا، ەكسترەميزم، تەرروريزم ءقاۋپى تۋىندايتىنىن ايتتى، - دەپ حابارلايدى Dalanews.kz.
ول اتىراۋدا ون شاقتى جىل بۇرىن بولعان وقيعانى ەسكە الىپ، سول كەزدە باتىس ءوڭىرى قانداي قيىندىقپەن بەتپە-بەت كەلگەنىن باياندادى.
"ءدىني ساۋاتىم جوق. ءدىني ساۋات قاي تۇرعىدا؟ جالپى دىندەردىڭ پايدا بولۋى، مونواتەيستىك دىندەر تۋرالى جالپى تۇسىنىگىم بار. اياتتاردى جاتقا وقىپ، حاديستەردەگى بولعان حيكايالاردى ايتىپ وتىراتىنداي ساۋاتىم جوق. مەن دىنمەن قاي ۋاقىتتا بەتپە-بەت كەلدىم؟ اتىراۋ وبلىسىنا 2012 جىلى وبلىس اكىمىنىڭ ورىنباسارى بولىپ باردىم. مەنىڭ جاۋاپتى سالالارىمنىڭ ءبىرى ءدىن ەدى. ول كەزدە وبلىس اكىمى باقتىقوجا ىزمۇحامبەتوۆ بولدى. بارعان كۇنى بىر-ەكى اپتادان كەيىن جارىلىس بولدى. قۇلسارىدا، جىلىوي اۋدانىندا. ءوزىمنىڭ قارايتىن سالام بولعان سوڭ اينالىسۋعا تۋرا كەلدى. اتىراۋ - ەكونوميكالىق تۇرعىدا ماڭىزدى ايماق. قانشا شەتەلدىك كومپانيالار بار؟! مۇناي قۇبىرلارى ءوتىپ جاتىر. ونداي دۇنيە جارىلاتىن بولسا، الەمدىك وقيعا بولادى، مۇناي باعاسىنا، قازاقستان ەكونوميكاسىنا اسەر ەتەدى. ءبىر جىل بۇرىن دا ءدال وسىنداي وقيعا بولعان ەكەن. ياعني 2011 جىلى پروكۋراتۋرا مەن ۇقك اراسىندا جەرگىلىكتى تۇرعىن ءوزىن جارىپ جىبەرگەن.
ول سالانى كوپ تۇسىنبەگەن سوڭ قايرات لاما شارىپكە باردىم، ول كەزدە ءدىن ىستەرى جونىندەگى اگەنتتىكتىڭ ءتوراعاسى. وسىنداي جاعداي، ماعان مىقتى ماماندار كەرەك دەدىم. ءسويتىپ ءبىراز مىقتى ماماندى اتىراۋعا جينادىق. تەولوگتاردى، ءدىنتانۋشىلاردى. ول كەزدە ساۋاتتى ءدىنتانۋشىلار ساۋساقپەن سانارلىق. اتىراۋعا سول تۇستا ەركىنبەك شوقاي، ەرسىن امىرە، ت.س.س. ءبىراز مىقتى ءدىندار جىگىت باردى. كۇندە اينالىساتىن شارۋامىزدىڭ ءبىرى وسى بولدى. تۇنگى ساعات 12-دە، قۇتپان نامازىنان كەيىن مەشىتكە باراتىنمىن. ءار تەولوگ كۇنىنە تورت-بەس كەزدەسۋ وتكىزەتىن. الىس اۋدانداردا، اۋىلداردا، ول كەزدە مەكتەپتەردە دە كەزدەسۋ وتكىزۋگە بولاتىن. تۇرمەلەرگە دەيىن كەزدەسۋ وتكىزىپ، كەشكە ساعات ون-ون بىردەن كەيىن مەشىتكە جينالاتىن. ساعات ون ەكى، بىرگە دەيىن قانداي اڭگىمە بولعانىن، قانداي ادامدارمەن كەزدەسكەنىن تالقىلايمىز. سوندا ءبىرقاتار اتا-انامەن مەن دە كەزدەستىم. ءبىر ءۇيدىڭ جالعىز بالاسى ەكەن. اناسى الىپ كەلدى. ۇلكەن كوتتەدجدە تۇرادى، جاعدايلارى بار ادامدار.
"مىنا بالام التى ايدان بەرى مەن بەرگەن تاماقتى ىشپەيدى، بىزبەن وتىرۋدان قالدى، مەنىڭ بالام ەمەس سياقتى، اتام دەسەڭدەر اتىڭدار، ۇستاپ الىپ كەتەم دەسەڭ ۇستاپ الىپ تۇرمەگە جابىڭدار" دەدى. "قارا جامىلعان قىزدى الىپ كەلدى، ونىڭ اتىن دا بىلمەيمىز، ەكەۋى جوعارىدا وزدەرىنىڭ بولمەسىنە كىرىپ كەتەدى، ءبىز تاماعىمىزدى ىشكەن سوڭ ولار تۇسەدى، ءارتۇرلى كۇماندى ادامدار كەلىپ جاتادى، قورقايىن دەدىك، جالعىز بالامىز ەدى" دەدى. بالاسى وتىر. سوندا ءدىني يدەولوگيا ساناسىن جاۋلاپ الادى دا، تۋعان اكە-شەشەسىن تالاق ەتىپ وتىر. وسى تۇرعىدان كەلگەن كەزدە تەرىس ءدىني يدەولوگيانىڭ قۇرباندارى قازاققا جانى اشيدى دەپ ويلاي المايمىن. جاۋىزدىق جاساۋ كەرەك پە، جارىلىس جاساۋ كەرەك پە؟! ولار سوعان بارادى"، - دەدى ول ULYSMEDIA-عا بەرگەن سۇحباتىندا.
شىڭعىس مۇقان مۇنداي جايت ءبىلىم جەتىسپەۋىنەن بولاتىنىن دا جەتكىزدى.
"ءدىندار دوستارىم بار، بەس ۋاقىت ناماز وقيدى، بارلىق العىشارتىن اتقارادى. مۇسىلماندار. ءدىن - قوعام ءۇشىن قاجەت دۇنيە. ىزگى امالداردى ناسيحاتتايدى. سونى ۇستانىپ جۇرەتىن، ادامزاتقا پايدا تيگىزەمىن دەيتىن ءدىندار جاماعات، ارينە، قوعام ءۇشىن دە پايدالى. دەگەنمەن ءدىن مەن ساۋاتسىزدىق قوسىلسا، مەنىڭ ويىمشا، ەكسترەميزم، تەرروريزم تۋدىرادى"، - دەدى ول ULYSMEDIA-عا بەرگەن سۇحباتىندا.
