الماتى وبلىسى، قاراساي اۋدانىندا ءمۇعالىم بولىپ قىزمەت اتقارعان ايەلگە بۇرىنعى كۇيەۋى شابۋىل جاساپ، اۋىر جاراقاتتاعان. وقيعا ايەلدىڭ ءوز ۇيىندە بولعان. جابىرلەنۋشى شامامەن ءبىر جىل بۇرىن كۇيەۋىمەن زاڭدى تۇردە اجىراسقان. جابىرلەنۋشى ايەل ءماجىلىس دەپۋتاتى يرينا سميرنوۆانىڭ جاقىن تانىسى بولىپ شىققان، دەپ حابارلايدى Dalanews.kz.
بۇل وقيعا تۋرالى دەپۋتاتتىڭ ءوزى الەۋمەتتىك جەلىدەگى پاراقشاسىندا جازدى. ونىڭ سوزىنشە، ەكس-ارىپتەسىنىڭ بۇرىنعى كۇيەۋى ءۇيدىڭ قاقپاسىن سىندىرىپ، ەسىكتى كۇشپەن اشىپ كىرگەن. ول ينسۋلت العان ناۋقاس اكەسىن ءتورت ساعات بويى بايلاپ، قورلاپ، كەيىن ۇيگە كەلگەن بۇرىنعى جۇبايى مەن ونىمەن بىرگە ەرىپ كەلگەن تانىسىنا شابۋىل جاساعان. ايەلدىڭ ءىشى مەن كەۋدەسىنە بىرنەشە جاراقات سالىنعان، اكەسى قاتتى سوققىعا جىعىلعان، ال ۇيدە بولعان ءۇشىنشى ادام باس سۇيەك-مي جاراقاتىن العان.
پوليسيانىڭ ارەكەتى
جابىرلەنۋشىلەر «جەدەل جاردەم» شاقىرىپ، ودان كەيىن پوليسياعا حابارلاسقان. الايدا پوليسيا بولىمىندە ءبىر ساعات بويى ەشكىم ولارعا نازار اۋدارماعان. دەپۋتاتتىڭ دەرەگى بويىنشا، جابىرلەنۋشىلەرگە سول مەزەتتە مەديسينالىق ساراپتامادان وتۋگە دە مۇمكىندىك بەرىلمەگەن. شاعىمدارىن ارەڭ قابىلداعان پوليسەيلەر وقيعا ورنىنا جەدەل تەرگەۋ توبىن جىبەرمەگەن، سونداي-اق رەسمي قابىلدانعان ارىزدىڭ كوشىرمەسىن بەرمەگەن.
العاشقى شابۋىل ەمەس
بۇل – ايەل ادامنىڭ بۇرىنعى كۇيەۋىنىڭ العاشقى شابۋىلى ەمەس. بۇعان دەيىن دە ول ۇيگە ۇرلانىپ كىرىپ، مۇلىكتەرىن قيراتىپ، كولىككە زاقىم كەلتىرگەن، ەكس-ايەلىن قورقىتۋ ماقساتىندا ءتۇرلى ارەكەتتەرگە بارعان. جابىرلەنۋشى بىرنەشە مارتە پوليسياعا ارىز ءتۇسىرىپ، قورعاۋدى سۇراعانىمەن، ەش ناتيجە بولماعان.
كۇدىكتى – تۇركيا ازاماتى، الماتى وبلىسىندا قۇرىلىسشى بولىپ جۇمىس ىستەگەن، ءقازىر جۇمىسسىز. جابىرلەنۋشى ونىڭ جازاسىز ارەكەتتەرى ەندى كىسى ولتىرۋگە دەيىن بارۋى مۇمكىن دەپ قاۋىپتەنەدى.
دەپۋتات بۇل وقيعا الماتى وبلىسىندا پوليسيا قىزمەتىنە قاتىستى وزگەرىس بايقالمايتىنىن، تۇرمىستىق زورلىق-زومبىلىق تۋرالى ارىز-شاعىمداردىڭ ءتيىستى دەڭگەيدە قارالمايتىنىن تاعى دا كورسەتتى دەيدى. سميرنوۆانىڭ سوزىنشە، قۇقىق قورعاۋ ورگاندارى ناقتى شارا قابىلداماسا، مۇنداي جاعداي قايتالانۋ ءقاۋپى جوعارى.
